ټاکل شوې د چهارشنبې په ورځ ترکیې ته شاوخوا ۲۰۰ نور کډوال د یونان له خوا واستول شي.
دا کار د هغه توافق له مخې کېږي چې ترکیې له اروپایې اتحادیې سره د کډوالو د بحران د کمولو په هدف کړی دی.
د دغو کسانو د هویت په اړه تر اوسه څه نه دي ویل شوي.
د ترکیې یوې حکومتي سرچینې د سې شنبې په ورځ ویلي چې د شاوخوا ۲۰۰ کډوالو دغه نوې ډله به د چهارشنبې په سهار د یونان له لیزبوس جزیرې څخه د اژه سمندرګي له لارې د ترکیې Dikili دیکیلي نومې ښار ته ورسیږي.
تر اوسه د دغو کډوالو د هویت او هم د لوژستیکي امکاناتو په اړه نور جزییات نه دي ورکړل شوي.
د دوشنبې په ورځ هم له یونانه ۲۰۲ تنه کډوال د هغه توافق له مخې بېرته ترکیې ته ولیږل شول چې په اروپا کې د کډوالو د روان بحران د هواري په هدف د ترکیې او اروپایې ټولنې ترمنځ شوې دی.
په هغو کډوالو کې یوازې دوه تنه یې د سوریې وګړي وو، خو پاته نور د پاکستان، افغانستان او هم د نورو افریقایې او منځني ختیځ هېوادونو وګړي وو.
تر بیړني راجسټرکولو او روغتیایې معایناتو وروسته به دغه نوي کډوال په بسونو کې د ترکیې کرکلیرلي Kirklareli سیمي ته واستول شي.
دوی به ترهغه وخته په دې ځای کې پاته شي چې خپلو هېوادونو ته تر استول کیدو دمخه یې دوسیې د ترکي چارواکو له خوا ارزول کیږي.
ترکیې ته د کډوالو د بیرته ستنولو موافقې د بشري حقونو د ډلو له خوا بحثونه راپورته کړي دي.
تر بیړني راجسټرکولو او روغتیایې معایناتو وروسته به دغه نوي کډوال په بسونو کې د ترکیې کرکلیرلي Kirklareli سیمي ته واستول شي.
یو انتقاد د بخښنې نړېوال سازمان له خوا دی چې ادعا کوي د کډوالو د بېرته ستنولو لپاره به ښایې ترکیه یو خوندي هېواد نه وي.
د دغه توافق له مخې ترکیې منلې چې هغه کډوال به بېرته مني چې د روان کال د مارچ تر شلمې نېټې وروسته یونان ته رسیدلي دي.
اروپا منلې چې د هر سوریایې وګړي د بیرته استول کیدو په بدل کې به دوی د ترکیې د کډوالو له لویو کمپونو څخه یو تن مني.
په دې اقدام سره دوی هیله لري چې خلک به وهڅیږي له اژه سمندرګي څخه د تېرېدو له خطره راوګرځي.
د ملګروملتونو د کډوالو ادارې د هغو ۱۳افغان کډوالو په اړه اندیښنه ښودلې چې د دوشنبه په ورځ د پناه غوښتنې تر وړاندیز دمخه بیرته ترکیې ته واستول شول.
راپور: فریبا ظاهر