افغان ولسمشر د ښځو په برخه کې تېرې لاسته راوړنې کافي ونه بللې او ټینګار یې وکړ چې ښځو ته په ټولو برخو کې ډېره ونډه ورکړل شي.
محمداشرف غني نن د افغان میرمنو د پياوړتیا لپاره د افغانستان او امریکا د ګډ پروګرام په پرانیسته کې وویل؛ اوسنی حکومت به په سیاسي، اقتصادي او فرهنګي برخو کې ښځو ته پراخه ونډه ورکړي.
"په وضاحت سره باید ووایم چې د ښځو ونډه باید زیاته شي. په اساسي توګه تقویه شي. موږ په خپلې وعدې ولاړ یو چې یوه افغان میرمنه به د لومړي ځل لپاره په سترې محکمې کې انتصاب کړو."
اخوا د امریکا ولسمشر باراک اوباما د ویډیو کنفرانس له لارې د افغان میرمنو د پیاوړتیا لپاره د دواړو هیوادونو هڅې وستایلې او د امریکا هراړخیزه ملاتړاو همکاري یې اعلان کړه.
د افغان میرمنو د پیاوړتیا په دغه ګډ پروګرام باندې ۲۱۶ میلیونه ډالره پانګونه شوې چې د امریکا متحده ایالتونو پراختیايي اداره یې تمویلوي.