د امریکا په منځګړیتوب د اوکراین د جګړې د پای ته رسولو لپاره د روسیې او اوکراین د استازو ترمنځ په متحده عربي اماراتو کې د خبرو لومړۍ ورځ پای ته ورسېده، خو لا څرګنده نهده چې په دغو خبرو کې څومره پرمختګ شوی دی.
دا خبرې د سې شنبې په ورځ «د لړم په ۱۹مه» په ابوظبي کې پیل شوې او ټاکل شوې چې د چهارشنبې په ورځ هم دوام وکړي.
د ازادې اروپا/ ازادي راډیو د خبر د مرکزي څانګې د راپور له مخې، د امریکا د بهرنیو چارو وزیر مارکو روبیو، چې په پاریس کې یې د اوکراین د بهرنیو چارو له وزیر سره کتلي، دغه خبرې ډېرې ګټورې بللې دي.
روبیو ویلي، په راتلونکي کې باید اروپايي متحدان هم په دغو درې اړخیزو خبرو کې ګډون وکړي، ځکه د جګړې د اوږدمهاله حل یوه برخه دي.
د امریکا د ولسمشر ډونالد ټرمپ زوم او په دغو خبرو کې د واشنګټن یوه مهم استازي جرډ کوشنر ویلي، د جګړې د پای ته رسولو لپارهیې د روسیې او اوکراین ترمنځ د اختلافونو د کمولو هڅې کړې دي، خو په دې اړهیې نور جزئیات نهدي ورکړي.
دا د روان کال له فبرورۍ راهیسې لومړی ځل دی چې د روسیې او اوکراین استازي مخامخ خبرې کوي.
د اوکراین د پلاوي مشر رستم عمروف ویلي، د دوی اساسي غوښتنه د خپل هېواد لپاره د امنیتي ضمانتونو ترلاسه کول او د تلپاتې سولې ټینګښت دی.
خو روسیې تر اوسه داسې نښه نهده ښودلې چې له خپلو پخوانیو غوښتنو، په ځانګړي ډول په ناټو کې د اوکراین د غړیتوب له مخالفت او د اوکراین د ختیځې دونباس سیمې د بشپړ کنټرول له غوښتنې، په شا شوي وي.
د روسیې د بهرنیو چارو وزیر سرګي لاوروف ویلي، د اروپا د امنیت د راتلونکي جوړښت لپاره باید لومړی روښانه اصول وټاکل شي او وروسته د روسیې او اوکراین د شخړې حل ته پام وشي.
په همدې حال کې، امریکا له روسیې غوښتي چې د اوکراین لپاره داسې امنیتي ضمانتونه ومني چې د ناټو د ګډې دفاع له اصولو سره ورتهوالی ولري.
د جرمني، فرانسې، بریتانیا، ایټالیا، ناټو او اروپايي ټولنې استازو هم له امریکايي چارواکو سره جلا سلا مشورې کړې دي، خو له روسیې سره په درې اړخیزو خبرو کې یې مستقیم ګډون نهدی کړی.
دا ډیپلوماتیکې هڅې داسې مهال روانې دي چې د روسیې او اوکراین ترمنځ جګړه لا هم په شدت دوام لري.
روسیه د اوکراین پر ښارونو او د برېښنا او تودوخې پر تأسیساتو هوايي بریدونو ته دوام ورکوي چې د ژمي په رانږدې کېدو سرهیې د اوکراین د ملکي وګړو اندېښنې زیاتې کړې دي.
د روسیې له بشپړ یرغل څخه نږدې پنځه کاله تېرېږي، خو لا هم څرګنده نهده چې د امریکا نوې ډیپلوماتیکې هڅې به د دغې خونړۍ جګړې د پای ته رسولو لپاره کومه عملي نتیجه ولري.
