اټکل کېږي چې په منځمهالو ټاکنو کې د ډموکراټانو بریا د روسیې، اوکرایین او ایران په وړاندې د ټرمپ تګلارې تر فشار لاندې راولي.
د امریکا متحده ایالتونو په منځمهالو ټاکنو کې چې سه شنبه د نومبر په دریمه وشوې ډموکراټانو د کانګرس د استازیو جرګې او سنا مجلس کنټرول په لاس کې واخیست.
د نیویارک ټایمز د راپور له مخې، ولسمشر ډونالډ ټرمپ ویلي چمتو دی چې د ټاکنو پایلې ومني او له ډموکراتانو سره ګډ کار وکړي.
د ډموکراتانو د بریا سربیره به ولسمشر ټرمپ په ډیپلوماټیکو اړیکو او د پوځي عملیاتو په برخه کې پراخ صلاحیتونه ولري.
په پرونیو ټاکنو کې خلکو د استازو جرګې ټولو ۴۳۵ څوکیو، د سنا جرګې له ۱۰۰ څوکیو څخه یواځې ۳۵ او د ۳۶ ایالتونو والیانو ته رایې ورکړې.
د دې ټاکنو پایلې په کانګرس کې د واک د بدلون څرګندويي کوي او ډموکراتان د فدرالي لګښتونو، اداري څارنې او د ولسمشرۍ کاندیدانو په برخه کې له لا زیات نفوذ برخمنوي.
خو د اټکل په اساس د کانګرس په دواړو جرګو د ډموکراټانو برلاسي به د ټرمپ اداره په تېره د روسیې، اوکرایین او ایران په تړاو د هغه تګلارې تر فشار لاندې راولي.
د امریکا دا منځمهالې ټاکنې داسې وخت وشوې چې متحده ایالتونه او اسراییل له ایران سره په جګړه کې دي، په اوکرایین د روسیې یرغل روان دی او د مسکو په اړه د واشنګتن دریځ د دوو مخکښو ګوندونو د اختلاف لوی ټکی دی.
د راتلونکي کانګرس لپاره د بهرنۍ پالیسۍ په برخه کې تر ټولو لویه ازموینه د ایران جګړه ده.
ډموکراټانو د دغه کړکیچ د ختمولو لپاره کمپاینونه کړي او استدلال یې کړی چې د دې جګړې په سبب د تیلو بیې بېساري لوړې شوي او اقتصادي بې ثباتي یې رامنځته کړې.
د دواړو جرګو کنټرول به د دوی وړتیا زیاته کړي چې اداره وڅېړي، پوځي لګښتونه وننګوي، او په پوځي عملیاتو محدودیتونه وضع کړي.
خو ډېرو شنونکو دا خبرداری هم ورکړی چې د ډیموکراتانو د سترې بریا سره سره دا لا قطعي نه ده چې تاثیرات به ولرلی شي.
ټرمپ لا هم اعلی سرقومندان دی او په پوځي عملیاتو او ډپلوماسۍ د پام وړ واک لري.
ګڼو جمهوري غوښتونکو د ایران د اټومي او سیمه ییز ګواښ په وړاندې د ایران د جګړې ننګه کړې او احتمالاً د بودیجې د محدودولو لپاره د ډموکراټانو د هڅو په وړاندې به مقاومت وکړي.
اخوا په کانګرس د ډموکراټانو کنټرول د اوکرایین لپاره چې څلور کاله یې د امریکا د ملاتړ په مټ د روسیې د یرغل په وړاندې مقاومت کړی له ډاډ او ابهام ډک پيغامونه لرلی شي.
په کانګرس کې د اوکرایین د ګڼو ملاتړو کاري دوره پای ته رسیږي خو اوکراییني – امریکایي بنسټونه باوري دي چې کییف لا هم د دواړو ګوندونو ملاتړ له ځانه سره لري.
دا پایلې همداراز ښايي د ټرمپ هغه هڅې هم له خنډ سره مخ کړي چې له مسکو سره د جوړجاړي په هڅه کې دی په تېره دا چې که د هغه اداره د بندیزونو لا زیات نرمښت لټوي.
