بروکسل د اروپا زړه او د اروپايي ټولنې یوه مهمه پلازمینه سه شنبه د طالبانو د یوه پلاوي کوربه ده.
که څه هم اروپايي هېوادونه د طالبانو حکومت په رسمیت نه پېژني خو دا طالب استازي له اروپا د ایستل کېدونکو افغان کډوالو پر سر د خبرو لپاره اروپا ته وربلل شوي.
د طالبانو د بهرنیو چارو وزارت منابعو ازادي راډیو ته تایید کړې چې د دغه وزارت ویاند قهار بلخي د پنځه کسیزه پلاوي مشري کوي.
د بلجیم د بهرنیو چارو وزارت ویلي چې د پنځو طالب استازیو لپاره یې یواځې د یوې ورځې ویزې ورکړي او له بلجیم بهر د شنګن نورو سیمو ته سفر نه شي کولی.
د طالبانو پلاوی له ترکیې بروکسل ته سفر کوي او ظاهراً یې همالته ویزې ترلاسه کړي.
بروکسل او د اروپايي ټولنې هېوادونو دا رد کړې چې د طالب چارواکو کوربه توب طالبانو ته مشروعیت ورکول دي خو د بشري حقونو مدافع سازمانونه او فعالان د اروپايي ټولنې په دې کار نیوکې کوي او وايي د طالبانو کوربه توب د اروپايي ټولنې له ارزښتونو سرغړونه ده.
د نوبل د سولې جایزې ګټونکې او د تعلیم د حقونو فعاله ملاله یوسفزۍ:
«اروپايي ټولنې د طالبانو چارواکي بروکسل ته بللي څو د مهاجرت د تړون په اړه بحث وکړي - او زه له دې موضوع ډېره متاثره او ناراحته یمه. دا هماغه طالبان دي چې نجونې یې له ثانوي زده کړو منع کړې او په زور یې واده ته اړ ایستلې. هماغه طالبان چې د دې میاشتې په پیل کې یې په هرات کې لسګونه ښځې د هغوی د جامو د طرز په خاطر ونیولې.»
د بشري حقونو په سازمان کې د افغانستان څېړونکې فرشته عباسي وايي اروپايي ټولنه له یوې خوا له طالبان د سرغړونو په خاطر غندي او له بلې خوا له طالبانو سره همکاري کوي څو افغانان په زور وباسي.
هغې زیاته کړې:
« افغانستان د نړۍ د بشري حقونو له تر ټولو بد ناورین سره مخ دی. دا هیواد د ښځو او نجونو لپاره د بنسټیز تبعیض او ظلم ځای ګرځیدلی. له طالبانو سره د مهاجرت هر ډول تړون به داسې یوه هېواد ته چې ښکاره نا امن دی د افغانانو د جبري ستنولو او شړلو خطرناکې لارې رامینځته کړي.»
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارډ بېنیټ هم پر اروپايي ټولنې غږ وکړ چې افغان کډوال افغانستان ته ستانه نه کړي.
هغه نن سه شنبې پر خپلې ایکس پاڼې لیکلي :«شکنجه او ناوړه چلند په افغانستان کې جدي خطر دی او د طالبانو د بهرنیو چارو وزارت له خوا ورکړل شوی تضمین دغه خطر نشي رفع کولی، زه د اروپايي ټولنې له غړو هېوادونو غواړم چې افغانان خطر ته ولیږي.»
د بښنې نړیوال سازمان د اروپا څانګې افغانستان ته د افغان کډوالو بېرته ستنول به د هغوی ژوند په خطر کې واچوي.
دې ادارې د افغانانو د اخراج لپاره د اروپایي ټولنې اقدام شرموونکی بللی او ادعا لري چې اروپا په دې کار سره د ځورونو، تري تم کول، خپلسرو نیولو، شکنجې، او غچ نیونې خطرونه له پامه غورځوي.
اروپايي ټولنې بیا ویلي چې دوی یواځې له غړو هېوادونو سره د طالبانو د خبرو اسانچاري کوي ځکه د خلکو د ایستلو پرېکړې د هېوادونو په لاس کې دي او یواځې مجرم کډوال به ایستل کېږي یا هغه چې د پناه غوښتنې شرایط یې نه دي پوره کړي.
خو پوښتنه دا ده چې طالبان د افغان کډوالو د ایستلو په بدل کې له اروپا څه غواړي؟
د جرمني د کورنیو چارو وزیر الکساندور دوبرنت د دغه هېواد دولتي رسنۍ ان ډي ار ته ویلي چې دوی له طالب استازیو سره په استانبول کې خبرې کړي.
د ده په خبره هېواد یې مجرم افغان کډوال باسي او غواړي د اخراج پروازونه زیات کړي.
ان ډي ار رسنۍ راپور ورکړی چې د دوی د څېړنو په اساس طالبان د دغو پروازونو د زیاتېدو په بدل کې له جرمني د ډېرو طالب استازیو د منلو غوښتنه کړې.
جرمني رسماً د طالبانو دوه ډپلوماټان منلي خو د راپورونو له مخې هڅه دا ده چې لږ تر لږه شپږ نور طالب استازي هم په جرمني کې ومنل شي.
