د رویټرز په وینا د امریکا ولسمشر ډونالډ ټرمپ خبرداری ورکړی، که هره ایراني بیړۍ د امریکا د سمندري ځواکونو د محاصرې کرښې ته نژدې شي " سملاسي به له منځه یوړل شي".
تر دې وړاندې د امریکا پوځ اعلان کړی چې د دوشنبې له ورځې به د هغو ټولو بېړیو سمندري محاصره پیل کړي چې د ایران بندرونو ته تګ راتګ کوي.
دوی ویلي، هغو بیړیو سره کار نه لري چې د هرموز تنګي له لارې غیر ایراني بندرونو ته تګ راتګ کوي.
له دې سره د ایران د سپاه پاسدران اړوند خاتم الانبیا قرارګا ویلي، که د ایران بندرونه وګواښل شي، فارس خلیج کې به هیڅ بندر خوندي پاته نه شي.
دغه پوځي بنسټ ویلي، په نړیوالو اوبو کې د بیړیو پر تګ راتګ " د محدودیت لګول" ناقانونه اقدام او سمندري غلا ته ورته دی.
د خاتم الانبیا قرارګا ویاند وړاندې ویلي " په فارس خلیج او عمان سمندرګي کې د بندرونو امنیت یا د ټولو لپاره دی، یا د هیچا لپاره هم نه."
له دې سره په اروپا او نوره نړۍ کې د دوشنبې په ورځ د تیلو بیه یو ځل بیا لوړه شوه.