په تهران کې د تیلو څو لویو چاڼځایونو او زیرمو اور اخیستی دی (ژوندی بلاګ)

د جرمني صدراعظم فریدریخ میرڅ وایي، پرایران د اسراییل او امریکا له خوا بریدونه ځینې خطرونه هم له ځان سره لري.

میرڅ د یکشنبې په ورځ په برلین کې وویل: "د دغو پوځي بریدونو هدف دادی چې د یوه کمزوري رژیم ویجاړوونکې لوبه پای ته ورسوي، خو دا کار له خطره خالي هم نه دی."

د جرمني ډي پي اې خبري آژانس د راپورله مخې میرڅ وویل هېڅوک نه پوهېږي چې "د ایران سخت غچ اخیستونکي بریدونه به سیمه د څه ډول کړکېچ پرلور بوځي" او یا دا چې "ایا له بهره د پوځي بریدونو له لارې په دننه کې د سیاسي بدلون د رامنځته کولو پلان به بریالی شي که نه."

میرڅ زیاته کړه چې د ایران د کورني سیاسي وضعیت درک کول ستونزمن دي او د لویدیځ هغه مداخلې چې په افغانستان، عراق او لیبیا کې یې کړي، ښایي یوازې تریوه حده د دې هیواد له شرایطو سره سمون ولري. نوموړي د لنډ مهاله ریښتیني خطرونو یادونه وکړه او ویې ویل چې له پایلو به یې موږ په جرمني او نوره اروپاکې هم اغیزمن شو.

د جرمني صدراعظم په ایران کې د ملايانو رژیم یو ترهګریز رژیم وباله چې د ده په خبره له لسیزو راهیسې د خپلو وګړو د ځپلو مسؤل دی."

امریکایي پوځي چارواکو وویل چې درې جنګي الوتکې په کویټ کې وروسته له هغې ولوېدې چې د کویټ د هوايي مدافعې ځواکونو له خوا په اشتباهي ډزو وویشتل شوې. دا د ایران په وړاندې د امریکا او اسرائیل د جګړې له پیل راهیسې، چې د شنبې په ورځ پیل شوه، د امریکایي الوتکو د نسکورېدو لومړۍ پېښه ده.

د امریکا مرکزي قوماندانۍ سینټکام نن دوشنبې د مارچ په ۲مه په یوه اعلامیه کې وویل چې د درېیوایف - ۱۵الوتکو ټول شپږ تنه عمله له الوتکو څخه ژوندي وتلي او د پراشوټونو په وسیله ځمکې ته راکوز شول چې وروسته د ژغورنې ټیمونو هغوی وموندل.

د ازادي راډیو د خبر د مرکزي څانګې د راپورله مخې پېښه په سیمه ییزوخت د سهار شاوخوا اته بجې هغه مهال رامنځته شوه، چې الوتکې په "فعالې جګړې" چې پکې د ایراني الوتکو، بالستیک توغندیو او بې ‌پیلوټه الوتکو بریدونه شامل وو، بوختې وې.

د کویټ دفاع وزارت هم تردې مخکې په یوه اعلامیه کې د څو الوتکو د لوېدو راپور ورکړی او ویلي و چې عمله یې ژغورل شوې او روغتونونو ته لېږدول شوې. خو په دغې اعلامیه کې د پېښې د لامل په توګه د خپلمنځي ډزو یادونه نه وه شوې.

په ټولنیزو رسنیو کې په خپرو شویو ویډیوګانو کې ښکاري چې لږ تر لږه یوه الوتکه له اسمانه را لویږي او یو کس د کویټ د الجهراء ښار پر سر د پراشوټ په وسیله ښکته کېږي.

په داسې حال کې چې جګړه خپلې درېیمې ورځې ته داخله شوې، پرایران د امریکا او اسرائیل په ګډو بریدونو کې چې واشنګټن ورته د "اپرېشن اپیک فیوري" نوم ورکړی تر اوسه د امریکا د پوځ د لږ تر لږه څلورو سرتېرو د وژل کېدو راپورونه ورکړل شوي دي. امریکایي رسنیو ویلي چې د وژل شویو درې سرتېري یې د لوژستیکي ملاتړد ډلې غړي وو چې کویټ ته استول شوي وو.

په همدې پېښه کې د امریکا د پوځ لږ تر لږه شپږ نور سرتېري هم ټپیان شوي دي.

ایران د هوايي بریدونو په ځواب کې د فارس خلیج شاوخوا د امریکا پر پوځي تاسیساتو او ښارونو د ډرونونو او توغندیو پراخ بریدونه کړي دي.

چارواکو وویل چې څلورم امریکایی د مارچ په ۲مه وروسته له هغې ساه ورکړه چې د ایران د لومړنیو بریدونو پر مهال سخت ټپي شوی و. دا روښانه نه وه چې نوموړی په کویټ کې ټپي شوی و او که په بل ځای کې. ایران د فبرورۍ په ۲۸ په توغندویي بریدونو کې د بحرین په مانامه ښارکې دیره د امریکا د سمندري ځواک د پنځمې قومندانۍ قرارګاه په نښه کړې وه.

د امریکا د دفاع "جنګ" وزیر د دوشنبې په ورځ په پنټاګون کې یوې خبري غونډې ته وویل: د ایران پر ضد پوځي عملیات به په "بې‌ پایه جګړه" بدل نه شي او هدف یې د تهران "د توغندویي، سمندري ځواک او نورو امنیتي بنسټونو له منځه وړل" دي.

پیټ هېګسټ ټینګار وکړ چې د امریکا بریدونه "په دقیق او پراخ ډول" ترسره کېږي.

هغه همدارنګه وویل: د اسلامي جمهوریت پر ضد جګړه د "ملت جوړونې" یا په ایران کې د "ډیموکراسۍ د ټینګولو" هڅه نه ده او واشنګټن نه غواړي په اوږدمهالو سیاسي پروژو کې ښکېل شي.

د امریکا د دفاع وزیر په وینا، دغه هېواد "د بریا لپاره جګړه کوي" او نه به وخت او نه هم د خپلو ځواکونو ژوند د خوښې وړسیاسي جګړو کې ښکیل کړي.