د امریکا ولسمشر ډونالډ ټرمپ د پنجشنبې په ورځ په ایران کې د مظاهرو له شدت سره همهاله وویل، که د ایران چارواکي " د خلکو په وژنه پیل وکړي" د دغه هېواد په ضد به جدي اقدام وکړي.
ټرمپ له محافظه کاره راډیویي ویاند هیو هویت ( Hugh Hewitt) سره مرکه کې ویلي: "ما هغوی ( ایراني چارواکو) ته ویلي، که د خلکو په وژنه پیل وکړي، هغه کار چې معمولا یې د اعتراضونو پر مهال کوي، مونږ به هغوی ته کله ضربه ورکړو."
د امریکا ولسمشر تر دې وړاندې هم دوه ځله د ایران حکومت ته د اعتراض کوونکو په وړاندې د تاوتریخوالي له کبله خبرداری ورکړی و.
دا په داسې حال کې ده چې د پنجشنبې په ماښام د ایران بېلابېل ښارونه په ۱۲مه ورځ د پراخو مظاهرو شاهدان وو.
تېره شپه په تهران او د ایران یوشمېر نورو سیمو کې انټرنیټ هم پرې شو.
د نیټ بلاکز مرکز چې نړۍ کې د انټرنیټ سرعت څاري تایید کړې چې تهران کې تېره شپه د انټرنیټ جریان پرچاو شوی دی.
پر تهران سربیره له تبریز، اهواز، کرمان، اصفهان، اراک، قایم شهر او یوشمېر نورو ښارونو څخه هم د مظاهرو راپورونه ورکړل شوي دي.
د ازادې اروپا/ازادۍ راډیو ایراني څانګې ته رسیدلې ویډیوګانې ښيي چې اعتراض کوونکي د علي خامنه یی په ګډون د ایراني چارواکو ضد او دغه راز د" ازادۍ، ازادۍ" شعارونه ورکوي.
مظاهرې لومړی د بهرنیو اسعارو په وړاندې د ایراني تومانو د بیې د ټیټېدو له کبله په تهران کې پيل چې وروسته یې لمن نورو ښارونو ته هم وغځېده.