وروسته له هغه چې د بریټانیا د حکومت لخوا د یوې افغان ښځې د پناه غوښتنې د ردولو په اړه راپورونه خپاره شول، په دغه هیواد کې یو شمیرمېشتو افغان ښځې د بریټانیا دا پریکړه غیر عادلانه بولي او په دې اړه د بیا غور غوښتنه کوي.
په بریټانیا کې ځینو میشتو د بشري او د ښځو د حقونو فعالانو ازادي راډیو سره خبرو کې وویل چې د طالبانو له لوري د ښځو د حقونو پراخوسرغړونو او په افغانستان کې د بشري حقونواوسني وضعیت ته په کتو، دغه هیواد ته د یادې ښځې بېرته ستنول به له ګواښه خالي نه وي.
له دې ډلې مریم مصطفوي وویل"دا واقعاً د اندېښنې ځای دی، د افغان ښځو د پناه غوښتنو ردول په ځانګړې توګه د هغو چې د بشري حقونو په فعالیتونو اواعتراضونو کې یې برخه اخیستې، ډېره اندېښمنوونکې ده، د بریټانیا په شان د ښځو د حقونو ملاتړو هېوادونو له لوري دې ددې وضعیت او ترخو حقایقو نادیده نیول د دغو ښځو ژوند له ګواښ سره مخ کوي،دا پریکړې باید د سیمو شرایطو او اصليګواښونو په بشپړه پوهه ولاړې وي، نه د عمومي ارزونو پر بنسټ."
په بریټانیا کې د ښځو د حقونو بلې مېشتې فعالې نظیفې حقپال ازادي راډیو ته وویل"په افغانستان د طالبانو تر واکمنۍ لاندې،جنسیتي اپارټاید روان دی او افغان ښځې او د هغوی د حقونو فعالانې له ګڼومحدودیتونو سره مخ دي، دوی شکنجه کېږي او حقونه یې نقضېږي او هر هغه څوک چې د ښځو د حقونو لپاره کار کوي،افغانستان کې له ګواښ سره مخ دي، نو په دې دلیل دا پرېکړه ناسمه ده او په دې پرېکړه د برټانسا حکومت باید له سره غوروکړي.”
بریټانیوۍ ورځپاڼې ګارډین تازه راپور ورکړی چې د بریټانیا حکومت د مستعار “مینا” نومې یوې افغانې ښځې د پناه غوښتنه رد کړې ده.
په راپور کې راغلي چې مینا په افغانستان کې د بشري حقونو د دفاع لپاره خپل ژوند له ګواښ سره مخ او وروسته یې بریټانیا پناه وړې ده.
د ګارډین په ټکو، د برټانیا د کورنیو چارو وزارت وړاندې معمولا د هغو مېرمنو چې د ښځو د پیاوړتیا لپاره یې د کار له امله د طالبانو لخوا د هدفګرځیدو خطر سره مخ وې او دا چې د لویدیځو پروژو سره به یې د همکارۍ اسناد او شواهد وړاندې کړل، د پناه غوښتنې غوښتنلیکونه یې منل.
خو د ۲۰۲۴ کال د وروستیو دریو میاشتو د کډوالۍ د احصایو له مخې، د ۲۶ افغان میرمنو د پناه غوښتنې غوښتنلیکونه هم د بریټانیا د حکومت لخوا رد شوي دي.
د ګارډین په راپور کې دا هم راغلي چې د مینا دوسیې ته د رسېدنې مامور ورته ویلي: "تشخیص شوې چې که ته بېرته افغانستان ستنه شې، دځورونو یا زیان له رښتیني خطر سره به مخ نه شې."
پر افغانستان د طالبانو له بیا واکمېندو وروسته، افغان ښځې د تعلیم او کار په ګډون له سختو محدودیتونو سره مخ شوې دي.
یو شمېر هغو ښځو چې د دې محدودیتونو په غبرګون کې یې اعتراضونو پیل کړي وو، د طالبانو لخوا بندیانې شوې او څه مودې یې د دوی په زندانونو کې تیرې کړې.
د طالبانو د حکومت له خوا د ښځو په وړاندې د دې ټولو محدودیتونو لګولو او له سختو اقداماتو وروسته، ډیری افغان ښځې له دغه هیواده ووتلې اوګاونډیو هیوادونو یا اروپا او امریکا ته کډوالې شوې.