د متحده ایالتونو جمهور رییس ویلي: که ایران موافقه ونه کړي نو بمبار به شي. داسې بمباري چې د ښاغلي ټرمپ په خبره «مخکې به یې هېڅکله نه وي لیدلي»
هغه غوښتنه وکړه چې نوی تړون باید دا تضمین کړي چې ایران د اټومي وسلو د ترلاسه کولو اراده نلري.
ښاغلي ټرمپ همدارنګه ګواښ وکړ چې پر ایران به "ثانوي تعرفې" ولګوي، تر څنګ یې دا خبره هم وکړه چې امریکایي او ایراني چارواکي "خبرې کوي".
د امریکا ولسمشر تېره اونۍ هم وویل چې هغه به غوره وګڼي له تهران سره د اټومي پروګرام په اړه یوې موافقې ته ورسیږي، خو که دا کار ونشي، نو د ایران لپاره به ډېر بد حالات راشي.
هغه بیا د وري/حمل په ۷مه اعلان وکړ چې له ایران سره د نوي اټومي تړون لپاره د خبرو په اړه یې د ایران رهبر علي خامنه ای ته یو لیک لیږلی. ټرمپ وویل: "موږ وروستیو شیبو ته رسیدلي یو." "موږ دوی ته اجازه نشو ورکولی چې اټومي وسلې ترلاسه کړي."
دا په داسې حال کې ده چې د یکشنبې په ورځ د ایران ولسمشر مسعود پزشکیان اعلان وکړ چې د ډونلډ ټرمپ لیک ته د ایران د رهبر ځواب د عمان له لارې امریکایي چارواکو ته رسول شوی.
د پزشکیان په خبره له امریکا سره مستقیمې خبرې نه کوي خو په غیرمستقیم ډول تل خبرو ته چمتو دي.
مستقیمې خبرې اترې رد شوې دي، خو غیر مستقیمې خبرې تل ایران کوي، او اوس مشرتابه ټینګار کړی چې غیر مستقیمې خبرې اترې دوام کولی شي."
د امریکا د ولسمشر لیک د متحده عربي اماراتو د ولسمشر د ډیپلوماټیک سلاکار انور قرقاش لخوا ایران ته وسپارل شو او د ایران د بهرنیو چارو وزیر عباس عراقچي د حمل په اوومه نیټه وویل چې د ایران ځواب د عمان له لارې د امریکا حکومت ته واستول شو.
یوه امریکایي چارواکي او دوو سرچینو چې د امریکا د ولسمشر د لیک په محتوا خبر وو ویلي ټرمپ تهران ته د واشنګټن سره د نوي اټومي تړون د لاسلیکولو لپاره دوه میاشتې وخت ورکړی دی.
ایران او شپږ نړیوال قدرتونه په ۱۳۹۴ کال کې د ګډ جامع عمل پلان (JCPOA) په نوم یوې اټومي موافقې ته ورسېدل، او ښاغلي ټرمپ، چې تل یې د دې موافقې پر موادو انتقاد کاوه، په ۱۳۹۷ کال کې له دې تړون د امریکا وتل اعلان کړل.
متحده ایالاتو بیا په څو ایراني پوځي او ملکي سکتورونو سخت بندیزونه ولګول، چې په ایران کې یې بې ثباتي او اقتصادي زوال رامنځته کړ.
ایران د اټومي وسلو د ترلاسه کولو هڅه ردوي، خو وروسته له هغه چې امریکا له اټومي تړون ووتله، ایران هم له خپلو ژمنو لاس واخیست او د یورانیمو د غني کولو کچه یې په چټکۍ سره ګړندۍ کړه.
