د طالبانو له بنده خوشي شوې امریکايي ښځه، فې دي هال د امریکا له ولسمشر دونالډ ټرمپ څخه مننه وکړه چې خپل هیواد ته د هغې په بېرته بیولو کې یې مرسته وکړه.
په هغه ویدیويي پیغام کې چې سپینې ماڼۍ پر خپله ایکسپاڼه کې خپور کړی، هال وايي:
«مننه چې زه دې کور ته راوګرځولم. ما هیڅکله تر دې حده په خپل امریکايي توب ویاړ نه و کړی. ولسمشره مننه. یوازې غواړم په دې پوی شئ چې په افغانستان کې ټولو بندي ښځو تل له ما پوښتنه کوله چې ټرمپ څه وخت راځي؟
دوی تاسو ته د ژغورونکي په سترګه ګوري. دوی انتظار دي چې تاسو یې خوشي کړئ. دوی ټولې لا هم بندیانې دي او هیڅ حقوق نه لری.»
فای دي هال، د امریکا د ولسمشر ډونالډ ټرمپ ته په خطاب کې وویل چې په افغانستان کې بندي ښځې انتظار باسي چې هغه یې خوشې کړي.
دا د فبرورۍ له میاشتې راهیسې په افغانستان کې د طالبانو له لوري بندي وه.
له خوشې کېدو وروسته د هغې روغتیايي وضعیت ښه وبلل شو.
فای هال د پنجشنبې په ورځ "د محکمې د حکم په پایله کې او د قطر په لوجیستیکي ملاتړ" خوشې شوې ده. قطر د امریکا په استازیتوب په دې قضیې کې منځګړیتوب کاوه.
هغه په افغانستان کې د بې اجازې ډرون د کارولو په تور نیول شوې وه.
"لویدېځې سرچینې وايي، هال د قطر سفارت ته وسپارل شوه او له یو لړ طبي معاینو وروسته د هغې ښه روغتیا تایید شوه. دا مهال، امریکا ته د هغې د بېرته ستنولو ترتیبات روان دي.
د هال یو عکس، چې د قطري چارواکو تر څنګ ناسته ده، د شنبې په ورځ د افغانستان لپاره د امریکا پخواني استازي زلمي خلیلزاد خپور کړی دی.
ښاغلي خلیلزاد د شنبې په ورځ ناوخته په خپله ایکسپاڼه (پخواني ټویټر) کې ولیکل چې دغه امریکایي ښځه اوس له قطري دوستانو سره په کابل کې ده او ډېر ژر به خپل کور ته روانه شي.
هغه همداراز د قطر د دوامداره او ثابتې همکارۍ لپاره مننه کړې ده.
هال وروسته له دې خوشي شوه چې د ټرمپ استازي ادام بوهلر او زلمی خلیلزاد کابل ته سفر وکړ، ترڅو د قطر په منځګړتوب د امریکایي جورج ګلزمن د خوشي کېدو هڅې وکړي.
امریکا په افغانستان کې دیپلوماتیک حضور نه لري، ځکه چې د ۲۰۲۲ کال د اګست په میاشت کې د طالبانو تر واکمنۍ وروسته یې خپل سفارت بند کړ. د دې پر ځای، قطر د امریکا استازیتوب کوي، او د دې هېواد د ګټو د ساتندوی رول لوبوي.
د امریکا ولسمشر ډونالډ ټرمپ د شنبې په ورځ په ټولنیزو رسنیو کې د هال یوه ویډیو شریکه کړه، چې پکې هغه مننه کوپ او وايي چې "ډیره خوشحاله" ده چې ټرمپ په واک کې دی.