د اغلې هریس په خبره چې ډونالډ ټرمپ او مرستیال به یې همدا میاشت یعنې د جنوري په شلمه د امریکا د ولسمشر په توګه لوړه وکړي.
د امریکا متحده ایالتونو د اساسي قانون له مخې د جمهوري ریاست له انتخاباتو وروسته د جنوري په شپږمه د کانګرس دواړه جرګې په ګډه غونډه کې د الېکټورل کالجونو یا ټاکنیزو پلاویو نتیجې تصویبوي.
ټرمپ په ولسمشرۍ ټاکنو کې چې د ۲۰۲۴ کال د نومبر په ۵مه وشوې له ټولو ۵۳۸ الکټرول کالجونو یا ټاکنیزو پلاویو ۳۱۲ وګټل.
هغه د عامو رایو له ډلې هم څه باندې ۷۷ میلیونه رایې ګټلې وې او تر خپل سیالې کمالا هریس څه باندې دوه میلیونه رایې مخکې وو.
په کانګرس کې د ولسمشرۍ ټاکنو د نتیجې تصدیق به مخکې کلونو کې رسمي پروسه او معمول کار وو خو د ولسمشر بایډن د بریا د تصدیق پر مهال د ټرمپ پلویانو د ۲۰۲۱ کال د جنوري په شپږمه په کانګرس یرغل ور ووړ او له پولیسو سره په اخ و ډب کې د ۱۴۰ پولیسو په ګډون سلګونه کسان ټپیان شول.
ګڼ هغه بریدګر په زندانونو کې دي خو منتخب ولسمشر ډونالډ ټرمپ یې د بښلو ژمنه کړې ده.
دا وار تر پخوا هغو د کانګرس ودانۍ کاپيټول هیل شاوخوا امنیتي تدابیر زیات شوي وو.
