دوی وايي د څښاک پاکې اوبه نه لري او د کښتونو لپاره اوبه هم په بشپړ ډول کمې دي.
د سپین بولدک ولسوالۍ اوسېدونکي وايي د تېرو کلونو جګړو او وچکالۍ د دې سیمې ژوند سخت اغېزمن کړی، چې اوس یې د اوبو د کمښت ستونزه لا پسې ډېره کړې ده.
د سپین بولدک د ناوې سیمې یو اوسېدونکی محب الله وايي د څښاک پاکې اوبه نه لري او اړ دي چې له لرې سیمو څخه غیر صحي اوبه خپلو کورونو ته راوړي.
د هغه په وینا، یوازې د ناوې په سیمه کې شاوخوا ۴۵ کلي د څښاک د اوبو له کمښت سره مخامخ دي.
محب الله زیاتوي: “دلته دې د اوبو لپاره موږ ته برمې ووهل شي. دلته تقریباً ۴۵ کلي دي، هر کلی ۴۰یا ۵۰ کورونه لري، خو موږ د اوبو لپاره برمې نه لرو.”
په سپین بولدک کې د وچکالۍ له امله د کرنې او مالدارۍ وضعیت هم خراب شوی دی.
د سیمې اوسېدونکي وايي چې د کروندو لپاره اړینې اوبه نشته، او د بارانونو د اوبو د ضایع کېدو مخنیوي لپاره چکډمونه باید جوړ شي.
د داد خان او جمعه ګل په نومونو دوه اوسېدونکي وايي چې د سیمې کاریزونه خراب شوي او د شېلو اوبه هم نه مهارېږي، چې له امله یې د کرنې لپاره اوبه نشته.
داد خان زیاتوي: “دغه زموږ علاقه یوه وچه ده. دغه کاریزونه په ساحه کې دغسې خراب پراته دي. موږ د نړیوالو نه غوښتنه کوو چې د اوبو د ستونزو لپاره ترتیبات برابر کړي.”
جمعه ګل زیاتوي:“موږ غوښتنه کوو چې شیلې وتړل شي، ترڅو کاریزونو ته اوبه پيدا شي او زموږ کرنې ته وده ورکړل شي.”
په سپین بولدک ولسوالۍ کې د طالبانو د حکومت مسوولین وايي چې د دې ولسوالۍ د اوبو د ستونزې حل لپاره یې ځینې اقدامات پیل کړي دي.
د یادې ولسوالۍ ولسوال مولوي رحیم الله محمود وايي چې په ولسوالۍ کې څو کوچني چکډمونه جوړ شوي دي، او په راتلونکي کال کې د ګڅۍ په سیمه کې د یوه لوی بند د جوړولو کار هم پیل کېږي.
مولوي رحیم الله محمود زیاتوي:“الحمدالله، دا اوس څو کوچني چکډومونه روان دي. راتلونکي کال کې د یو لوی بند د جوړولو کار روان دی، چې د ګڅۍ پر مانده به جوړ شي. انشاالله امارت زیاته توجه ورته لري.”
سپین بولدک ولسوالي، چې د کندهار ښار جنوب ختیځ ته په ۱۱۰ کیلومترۍ کې پرته ده، له ډیرو کلونو راهیسې د حکومتي پاملرنې له کمښت سره مخ ده.
د دې ولسوالۍ ډیری خلک د کرنې او مالدارۍ پر عایداتو متکي دي، چې د وچکالۍ او اوبو د کمښت له امله له سختو اقتصادي ستونزو سره مخ دی.
د سیمې اوسېدونکي د کاریزونو پاکولو، د چکډمونو جوړولو، او د لویو بندونو جوړولو غوښتنه لري، ترڅو د وچکالۍ اغېز راکم او د اوبو ستونزې حل شي.
