ایران خپلې خاورې ته د افغان کډوالو د غیرقانوني ورتګ د مخنیوي لپاره له افغانستان سره په خپله ختیځه پوله کې د ۳۵ کیلومټره دیوال د جوړولو چارې بشپړې کړي دي.
د ایران د راډیو تلویزیون خبري اژانس د ایران په جنوب ختیځه سیمه کې د ځمکنیو ځواکونو د قرارګاه د قوماندان امیر غلامعلیان له قوله ویلي چې د ایران د جنوب ختیځې پولې له بندېدو وروسته د افغانانو تګ راتګ پنځوس سلنه کم شوی دی.
دغه ایراني چارواکي ویلي چې جوړ شوی دیوال یوازې فزیکې مانع نه بلکې په پرمختللۍ ټکنالوجۍ سمبال دیوال دی چې د پولې په اوږدو کې د خوندي تګ راتګ لپاره ټول تدابیر په کې پام کې نیول شوي دي.
د راپورونو له مخې د پولو په اوږدو کې د دیوال د جوړولو چارې د رضوي خراسان، جنوبي خراسان او سیستان و بلو چستان په سیمو کې دوام لري چې تر راتلونکو ۳ کلونو به یې چارې بشړې شي.
ایران وايي د دغه اقدام موخه د امنیت ټینګښت او د انسان او وسلو د قاچاق مخنیوی دی، خو سیاسي او امنیتي کارپوهان وايي د ورته دیوالونو جوړول د حل لار نه ده.
امنیتي کارپوه احمد خان اندړ په دې اړه ازادي راډیو ته وویل :
«د دیوال جوړول هېڅکله د قاچاق او ترهګرو مخه نه شي نیولای ځکه چې ترهګري یوه نړیواله پدیده ده چې ریښې یې په سیمه او نورو هېوادونو کې دي باید په دې برخه کې بله لار پیدا کړي دا یوه پلمه ده چې ایران یې په وروستیو کې کوي.»
د تېر جمهوري نظام پرمهال په ایران کې د افغانستان سفیرعبدالغفور لیوال وايي چې د جمهوریت پرمهال له ایران سره داسې هوکړه شوې وه چې که افغان کډوال له قانوني او یا غیر قانوني لارو ورغلي وي د اوسېدو اسناد به ورکوي خو وايي د جمهوریت له نسکورېدو وروسته دا پروسه له منځه ولاړه.
«د کډوالو وروستیو او تازه څپو ته په کتو که چیرته دوی ته د اوسېدو اسناد ورنه کړل شي فکر کوم چې د دیوالونو په جوړلو به یې کنټرول او مدیرت ونه شي، ښه به دا وي چې په دې برخه کې یوه هوکړه وشي او یا دا چې پخوانۍ هوکړه بیا پلي شي.»
افغانستان او ایران په ټوله کې څه باندې ۹۰۰ کیلومټره ګډه پوله لري.
ایران چارواکو د سږکال په ثور میاشت کې له افغانستان سره پرخپله ګډه پوله د دیوال جوړولو او د پولې د بندېدو خبر ورکړی و.
د ایران د کورنیو چارو وزارت د امنیتي چارو مرستیال مجید میر احمد د ۱۴۰۳ کال په لومړیو کې ویلي چې ایراني ځواکونو د پولو د بندولو لپاره تر راتلونکو پنځو کلونو درې میلیارده ډالر په پام کې نیولي دي.