د ولسمشر په توګه د ډونالډټرمپ ټاکل کېدو ته غبرګونونه
د طالبانو د حکومت په ګډون د نړۍ د بېلابېلو هېوادونو مشرانو او سیاستوالو ډونالډټرمپ ته د امریکا د منتخب ولسمشر په توګه د بیا ټاکل کېدو مبارکې ورکړې ده.
د طالبانو حکومت
د طالبانو د بهرنیو چارو وزارت ویلي، د متوازن بهرني سیاست په رڼا کې هیله لري چې، د امریکا راتلونکی حکومت واقعبینانه ګامونه پورته کړي.
د دغه وزارت په یوه خبرپاڼه کې چې ویاند یې عبدالقهار بلخي پر خپله ایکسپاڼه/ پخواني ټویټر خپره کړې، هیله څرګنده شوې چې: "د دواړو هېوادونو ترمنځ په اړیکو کې ملموس پرمختګ رامنځته شي او دواړه هېوادونه وکولای شي د متقابل تعامل په رڼا کې د اړیکو نوی څپرکی پرانیزي."
په دغې خبرپاڼه کې دغه راز تمه ښودل شوې چې: "ښاغلی ټرمپ به سيمه او نړۍ کې روانې جګړې، په ځانگړې توگه، غزه او لبنان کې د روان ظلم او تېري پای ته رسولو کې رغنده رول ولوبوي."
د ملي مقاومت جبهه
د ملي مقاومت جبهې په نوم د طالبانو سیاسي او وسلهوالې مخالفې ډلې هم ټرمپ ته مبارکي ورکړې.
دغې جبهې په یوه خبرپاڼه کې چې پر ایکس شبکې خپره شوې، له افغانستانه د امریکایي ځواکونو وتلو ته په اشارې ویلي، اوس د تېروتنو د اصلاح وخت دی.
د نړۍ ګڼشمېر مشرانو هم نن چهارشنبه ډونالډټرمپ ته په ټاکنو کې د بریا مبارکې ورکړې.
د فوزیه کوفي په ګډون د افغانستان یوشمېر ښځینه فعالانو او د افغانستان یوشمېر پخوانیو سیاستوالو هم ټرمپ ته مبارکي ورکړې.
د اوکراین ولسمشر
د اوکراین ولسمشر ولودمیر زلنسکي چې هېواد کې یې له څه باندې دوو کلونو راهیسې د روسیې جګړه روانه ده، ویلي، دی "د ځواک پر مټ سولې ته" د ډونالډټرمپ د ژمنتیا هرکلی کوي.
زلنسکي پر خپله ایکسپاڼه لیکلي، دا په واضح ډول هغه تګلاره ده چې اوکراین کې سوله راوستلی شي.
د اسراییل صدراعظم
د اسراییل صدراعظم بنیامین نتنیاهو ویلي: "د تاریخ په لوی بېرته راتګ سره، تاسو ته مبارکې وایم". نتنیاهو پر خپله ایکسپاڼه لیکلي، دا به د امریکا او لوی متحد اسراییل ترمنځ یو نوی پیل وي.
د هند صدراعظم نریندرا مودي
د هند صدر اعظم نریندرا مودي ویلي: "زما ملګریه د زړه له کومې درته د تاریخي مبارکې وایم . سترګې په لاره یم چې د هند او امریکا نړیواله او ستراتېژیکه ملګرتیا نوره هم پياوړې کړو."
د فرانسې ولسمشر
د فرانسې ولسمشر ایمانویل مکرون پر خپله ایکسپاڼه لیکلي: "لکه څنګه چې پوهېږو، چمتو یو چې د څلورو کلونو په موده کې ګډ کار وکړو."
د جاپان صدراعظم
د جاپان صدر اعظم شیګیرو ایشیبا ویلي، دی ټرمپ ته مبارکي وایي او د امریکایانو دیموکراتیک غوراوي ته درناوی کوي.
د کاناډا صدراعظم
د کاناډا صدراعظم جسټن ترودو ویلي، د امریکا او کاناډا ترمنځ ملګرتیا د نړۍ یو ارمان او حسادت دی.
هغه ويلي: "زه پوهېږم چې ولسمشر ټرمپ او زه به په ګډه کار وکړو چې د دواړو هېوادونو ولسونو ته فرصتونه، نېکمرغي او امنیت برابر کړي."
د ترکیې ولسمشر
د ترکیې ولسمشر رجب طیب اردوغان ویلي، خپل ملګري ډونالډ ټرمپ ته مبارکي وایي او هیله لري چې د ترکیې او امریکا اړیکې به پیاوړې شي ترڅو د فلسطین او اوکراین په ګډون سیمهییزې او نړیوالې شخړې او لانجې هوارې شي.
د جرمني صدراعظم
د جرمني صدر اعظم اولاف شولڅ ویلي، جرمني او متحدهایالتونو له اوږدې مودې راهیسې بریالی ګډ کار کړی، د خپلو اتباعو د ګټې لپاره به دغه کار ته دوام ورکړو.
د سعودي عربستان پاچا
د سعودي عربستان پاچا ملک سلمان او ولیعهد محمد بن سلمان هم ټرمپ ته د بریا مبارکي ورکړې ده.
د بریتانیا صدراعظم
د بریتانیا صدر اعظم کییر سټارمېر ټرمپ ته مبارکي ورکړې او هیله یې ښودلې چې په راتلونکو کلونو کې به ګډ کار ته دوام ورکړي.
دوی ویلي، د نژدې متحدانو په توګه اوږه په اوږه د ګډو ارزښتونو د دفاع په خاطر سره دریږي.
د پاکستان، مصر، اردون، برازیل، جنوبي افریقا، استرالیا او ګڼشمېر نورو هېوادونو مشرانو هم ټرمپ ته د مبارکۍ پيغامونه لېږلي او هغه سره یې د ملګرتیا او اړیکو د دوام هیله کړې ده.
ډونالډټرمپ په فلوریدا ایالت کې خپلو پلويانو ته وينا وکړه
د اسوشیتید پریس او CNN په ګډون د ډېرو امریکايي رسنیو د راپورونو لهمخې په ویسکانسن ایالت کې په بریا سره، د امریکا د ولسمشریزو ټاکنو جمهوري غوښتونکي نوماند او پخوانی ولسمشر ډونالډټرمپ د ولسمشر مرستیالې او د دیموکرات ګوند نوماندې کامالا هاریس ته د ولسمشرۍ د ګټلو لپاره د اړتیا وړ ۲۷۰ ټاکنیزې رایې ترلاسه کړي.
د اسوشیتید پریس د خبر پر اساس، ټرمپ د نومبر په ۵مه د رایې ورکولو وروسته ۲۷۷ الکټرال کالج یا د انتخاباتي پلاو رایي ترلاسه کړي دي.
له اووه مهمو ایالتونو ټرمپ په شمالي کارولینا، جورجیا، پنسلوانیا او ویسکانسن کې رایې ګټلي او په مشیګن، نیواډا او اریزونا کې مخکې و.
په متحدهایالاتو کې د ټاکنو پایلو چهارشنبې نومبر شپږمه (لړم ۱۶مه) وښودله چې د جمهوري غوښتونکو ګوند له ډیموکراتانو څخه د سنا په مجلس کې اکثریت ګټلي دي.
جمهوري غوښتونکي په تېرو څلورو کلونو کې په سنا کې اقلیت وو او وروستي بري یې ددغه ګوند دا هڅې پیاوړې کړي، چې د دولت په ټولو برخو کې واک په خپل لاس کې واخلي.
لهدې بري سره راتلونکی جمهوري غوښتونکی ولسمشر به وتوانیږي چې د خپلو تګلارو په پلي کولو کې پراخ ملاتړ ترلاسه کړي.
دا پهداسې حال کې ده چې د پایلو له رسمي اعلان نه وړاندې ټرمپ خپلو پلویانو او د خپل د انتخاباتي کمپاین ټیم ته د بریا مبارکي ورکولو ترڅنګ ځان کټونکي اعلان کړ.
ټرمپ د نومبر په شپږمه سهار وختي دا وینا د فلوریدا ایالت په پالم بیج کې د خپلو پلویانو ترمنځ وکړه او زیاته یې کړه: "زه به تر هغه وخته ارام نهشم چې موږ هغه پیاوړې، خوندي او هوسا امریکا ته چې زموږ ماشومان یې او تاسو یې مستحق یاست، نه وي سپارلي."
ډونالډټرمپ چې یو سوداګر دی، په ۲۰۱۶ کال کې وتوانېد چې د بهرنیو چارو پخوانۍ وزیرې او د ډیموکراټ ګوند نوماندې هیلري کلنټن ته ماتې ورکړي او ولسمشر شي.
ټرمپ په ۲۰۲۰ کال کې، د دیموکرات ګوند کاندید جوبایډن په وړاندې ماتې وخوړه.
ټرمپ د خپل ټاکنیز کمپاین پر مهال په بېلابېلو قضیو کې محکمې ته حاضر شو، خو هغه تل په ټولو قضیو کې خپله بېګناهي اعلان کړه.
ټاکل شوې چې د متحدهایالاتو نوی ولسمشر به د ۲۰۲۵ کال د جنورۍ په ۲۰ د امریکا د ۴۷م ولسمشر په توګه لوړه وکړي او خپل کار به پیل کړي.
د ټاکنو د پايلو له اعلان مخکې د نړۍ يوشمېر مشرانو ډونالډ ټرمپ ته د بريا مبارکي ورکړې
پهداسې حال کې چې د امریکا د ولسمشریزو ټاکنو وروستۍ پایلې لا نهدي اعلان شوي، د نړۍ یوشمېر مشرانو ډونالډټرمپ ته پهدې ټاکنو کې د بریا مبارکي ورکړې ده.
د اسرايیلو لومړي وزیر بنیامین نتنیاهو، د هنګري لومړي وزیر اوربان ویکټور، د بریټانیا لومړي وزیر کیرسټارمرډ، د هند لومړي وزیر نریندرا مودي، د ایتالیا لومړۍ وزیرې جورجیا ملوني، د چک جمهوریت لومړي وزیر پیتر فیالا، د ناټو عمومي مشر مارک روته له هغه رهبرانو څخه دي، چې تر اوسه یې ټرمپ ته مبارکي ورکړې ده.
د نړۍ د رهبرانو تر څنګ د افغانستان د سولې لپاره د امریکا ځانګړي پخواني استازي زلمي خلیلزاد د ټرمپ بریا لپاره پر خپله ایکسپاڼه هغه ته مبارکي ورکړې.
د امريکا ولسمشريزې ټاکنې؛ ټرمپ بريا ته نږدې شوی
د امریکا د ولسمشرۍ لپاره د جمهوریپالو د ګوند کاندید پخوانی ولسمشر ډونالډ ټرمپ نژدې ده چې سپینه ماڼۍ وګټي.
ټرمپ دغه بري ته وروسته له هغې نژدې شو چې، په دوو برخلیک ټاکونکو ایالتونو، شمالي کارولینا او جورجیا ایالتونو کې ګټونکی اعلان شو.
پهدې سره د هغه سیالې د ډیموکرات ګوند د کاندیدې د ولسمشر مرستیالې کامالا هریس لپاره د بري چانس ډېر لږ شوی دی.
د امریکایي رسنیو د راپورونو لهمخې چې د دغو انتخاباتو بهیر له نژدې څاري، ټرمپ ۲۴۶ الکټرال کالجونه یا د انتخاباتي پلاو رایې ګټلي دي.
هاریس تر اوسه ۲۱۰ رایې خپلې کړې دي.
د دې لپاره چې یو کاندید د انتخاباتو ګټونکی اعلان شي، لږ تر لږه د ۲۷۰ الکټرال کالج یا د انتخاباتي پلاو د رایو ترلاسه کولو ته اړتیا لري.
په نورو برخلیک ټاکونکو ایالتونو، اریزونا، میشیګان، نیوادا، پنسلوانیا او ویسکانسن ایالتونو کې ټرمپ په لږ توپیر له خپلې سیالي کامالا هریس څخه مخکې دی، چې د نوموړې هغه هیلې چې ښایي د رایو نتیجې بدلې شي، مړاوې کوي.
د ټرمپ انتخاباتي ټیم بیګا نیمه شپه وویل چې، نوموړی به په فلوریدا کې له خپل هستوګن ځای څخه پالم بیچ کې انتخاباتي مرکز ته لاړ شي ترڅو خپلو پلویانو ته وینا وکړي.
په عین حال کې د مېرمن هاریس انتخاباتي کمپاین ویلي، نوموړې به دې ته منتظره پاتې شي ترڅو ټولې رایې شمېرل شوې نهوي او بیا به نن چهارشنبې د ورځې په وروستیو کې ملت ته وینا وکړي.
په دغو انتخاباتو کې رایې ورکونکو همدارنګه د کانګرس د دواړو جرګو، د استازیو جرګې د ټولو ۴۳۵ غړیو او د سل کسیزې سنا جرګې د ۳۴ غړیو د غوره کولو لپاره رایې ورکړې.
د لومړنیو شمېرو لهمخې د سنا جرګې چې ډیموکراټانو پهکې په لږ توپیر اکثریت درلود په دغې جرګې کې هم اکثریت خپل کړی دی.
د امریکا د شاخوا ۳۳۴ ملیونه نفوس له اتلسو کلونو پورته شاوخوا ۲۵۰ ملیونه وګړي د رایې ورکولو پر شرایطو برابر ښودل شوي او د شمېرو لهمخې د نومبر له پنځمې یعنې د انتخاباتو له ورځې مخکې شاوخوا نوي ميلیون وګړو خپلې رایې د پوستې له لارې یا حضوري کارولي دي.
تمه کېږي چې د رایې ورکونکو شمېر به چې د احصایي د ملي ادارې د شمېرو لهمخې په ۲۰۱۶ او ۲۰۲۰ کلونو کې لوړ و، دا ځل هم زیات وي.
په ۲۰۲۰ م کال کې چې د امریکا په ګډون په نړۍ کې د کویډ ـ۱۹ ناروغې نوې خپره شوې وه، شاوخوا ۱۵۸ميلیونه او څلور لکه رايه ورکونکو چې د ټولو مستحقو رايه ورکونکو ۶۶،۸سلنه بلل شوي، خپلې رایې کارولې وې چې دا د امریکا په انتخاباتو کې د خلکو تر ټولو پراخ ګډون بلل شوی.
د انتخاباتو فدرالي چارواکو له انتخاباتو یوه ورځ مخکې د نوامبر په ۴مه خبرداری ورکړی و، چې سیالیو ته په ورنژدې کېدو سره روسیې او ایران هڅې زیاتې کړي چې پر دغو انتخاباتو خپل نفوذ خپور کړي او په رايه ورکونکو کې اختلافات رامنځته او هغوی د انتخاتي چارواکو پرضد تاوتریخوالي ته ولمسوي.
که ټرمپ چې په ۲۰۲۰ م کال کې یې انتخابات اوسني ولسمشر جوبایډن ته بایللي، د دغو انتخاباتو ګټونکی اعلان شي، نوموړی به د امریکا د ۴۷ ولسمشر په توګه د سپینۍ ماڼۍ واګې ترلاسه کوي.