ایراني چارواکو نن چهارشنبې اعلان وکړ چې د آیفون ټیلیفون د وروستیو ماډلونو پر پېرلو لګول شوی بندیزیې لرې کړی دی.

دغه بندیز له څه باندې ۱۹ میاشتو راهیسې لګول شوی و.

د ایران د مخابراتو وزیر ستار هاشمي پر خپلې ایکس‌پاڼې یا پخواني ټویټر ولیکل چې د آیفون ټیلیفونونو د واردولو په اړه نور جزییات او مقررات به په نژدې راتلونکې کې اعلان شي.

هغه په دې اړه نور جزییات نه‌دي ورکړي، خو ویلي یې دي چې د ایران ولسمشر مسعود پزشکیان د دغه اقدام ملاتړ کړی دی.

ویل کېږي د ۲۰۲۳م کال د فبرورۍ په میاشت کې د آیفون ۱۴ او ۱۵ ماډلونو پر وارداتو او پېرلو دغه بندیز د دې لپاره لګول شوی وچې دا هېواد چې د اټومي پروګرام په خاطر پرې لګول شویو بندیزونو یې اقتصاد ډېر خراب کړی، د بهرنیو اسعارو لګښتونه محدود کړي.

امريکا د اسراييل له لوري د ملګروملتونو پر مرستندويه ادارې د بنديز د قانون په اړه اندېښنه ښودلې

د امریکا متحده‌ایالتونو پرهغه قانون ژوره اندېښنه څرګنده کړې چې، د اسراییل پارلمان د دوشنبې په ورځ تصویب کړی او له‌مخې یې د ملګرملتونو پر لویې ادارې، UNRWA چې په غزې تړانګه او د اسراییل په ګډون په منځني ختیځ کې د فلسطینیانو لاس‌نیوی کوي، بندیز لګوي.

د متحده‌ایالتونو د بهرنیو چارو وزارت ویاند متیو میلر پرون سه‌شنبې ناوخته په یوه خبري غونډه کې د دغه قانون په اړه چې له‌مخې یې د ملګروملتونو دغه مرستندویه اداره په اسراییل کې له هر ډول فعاليت څخه منع کېږي او هم اسراییلي چارواکي ورسره له هر ډول اړیکو راګرځوي، په غبرګون کې وویل چې واشنګټن د دغه قانون په اړه په ښکاره اندېښنې او هم یې ورسره مخالفت څرګند کړی دی.

د هغه په خبره متحده‌ایالت دغه قانون ته ډېره اندېښنه ځکه لري چې هغه کولای شي، په لوېدیځه غاړه، غزه او ختیځ بیت‌المقدس کې د دې ادارې فعالیتونه بند کړي.

د ښاغلي میلر په خبره د دې خطر شته چې د اسراییل د دغه اقدام په نتیجه کې په ميلیونونو فلسطینیان چې د ملګروملتونو پر دغې مرستندویه ادارې متکي دي، د روغتیاپالنې او د لومړنیو او ثانوي زده‌کړو په ګډون له اساسي خدمتونو بې‌برخې شي.

د غزې تړانګې په شمالي برخه کې نن چهارشنبې د اسرايیلو په دوو هوايي بریدونو کې د لسګونو ښځو او ماشومانو په ګډون لږ تر لږه ۸۸ کسان ووژل شول.

روغتیايي چارواکو او د یوه روغتون مشر ویلي چې، د ژوند ګواښوونکو ټپیانو درملنه ځکه نه‌شي کېدای چې د اسرايیلي ځواکونو د اوونۍ د پای په عملیاتو کې په لسګونو ډاکټران توقیف شوي دي.

اسراییل په وروستیو اوونیو کې د غزې په شمال کې هوايي بریدونه زیات کړي او هم یې پراخ ځمکني عملیات پیل کړي دي.

اسراییل ویلي چې، دغه عملیات د حماس چې د متحده‌ایالاتو او اروپايي اتحادیې له‌خوا د یوه ترهګر سازمان په توګه پېژندل شوی، د سخت‌دریځې ډلې د وسله‌والو په له‌منځه وړلو متمرکز دي.

د جګړې له پراخېدو سره د غزې په شمال کې د سلګونو زرو فلسطینیانو د خرابېدونکي بشري وضعیت په اړه اندېښنې زیاتې شوې دي.

د امریکا مرستیال ولسمشرې او د ولسمشرۍ په انتخاباتو کې د ډیموکرات ګوند کاندیدې کامالا هریس پر خپل سیال پخواني ولسمشر ډونالډټرمپ تور لګولی چې، بې‌ثباته دی او د غچ اخیستو عادت لري.

مېرمن هریس دا څرګندونې پرون سپینې ماڼۍ ته نژدې په یوه پراخه غونډه کې وکړې.

هغې ژمنه وکړه چې د ټولو امریکايانو ولسمشره به وي، خو خپل سیال یې تورن کړ چې د بې‌کنټروله قدرت په لټه کې دی.

د دې غونډې تنظیموونکو وویل شاوخوا ۷۵ زره کسان هلته راټول شوي وو.

که څه هم دا شمېرې د پولیسو او خپلواکو څارونکو له‌خوا نه‌دي تایید شوي، خو د راپورونو له‌مخې د هریس ځینو پلویانو په هغه پارک کې چې ټرمپ څلور کاله مخکې وینا کړې وه، اووه ساعته انتظار وکړ څو د هریس وینا واوري.

په همدې پارک کې د ۲۰۲۱ کال د جنوري په شپږمه ښاغلي ټرمپ خپلو پلویانو ته مخکې له‌‌دې چې هغوی د کانګرس پر ودانۍ برید وکړي، وینا کړې وه.

پخوانی ولسمشر او پلویان یې دا برید کم اهمیته موضوع بولي.

ملګري ملتونه وايي، که اسراییل د فلسطینیانو لپاره د دې سازمان له څانګې سره د اړیکو د پرې کولو اړوند نوی قانون عملي کړي، نو د اسراییلو حکومت به د فلسطیني وګړو اړتیاوې د نړیوالو قوانینو په اساس پوره کوي.

د اسراییل پارلمان پرون هغه قوانین تصویب کړل، چې د اسراییلو په خاوره کې د ملګروملتونو د ځانګړې څانګې UNRWA پر فعالیت بندیز لګوي، اړیکي ورسره پرې کوي او د تروریستي ادارې په نوم یې یادوي.

د ملګروملتو د ویاند ستیفان دوجاریک په وینا سرمنشي انتونیو ګوتېریش ویلي چې، د فلسطینیانو لپاره د ملګروملتونو ځانګړې اداره بل بدیل نه‌لري.

ګوتېرش ویلي دي چې UNRWA د اسراییل او حماس ډلې ترمنځ د روانې جګړې پرمهال د فلسطینیانو لپاره د ژوند ژغورنې یوازینۍ مرستندویه اداره ده، خو د هغه په وینا د اسراییلو نوی قانون به په غزه کې پر روان بشري وضعیت ناوړه اغېز وکړي.

د روسیې د بهرنیو چارو وزارت پرون سه‌شنبې اعلان وکړ، چې پر ۱۳۱ اسټرالیایي اتباعو یې بندیزونه لګولي او هغوی یې روسیې ته له سفر کولو منع کړي دي.

د روسیې له‌‌خوا په دغو بندیزونو کې د اسټرالیا د دفاعي صنایعو استازي، خبریالان او نورې عامې څېرې چې مسکو هغوی د "روسیې ضد اجنډا" په خپراوي تورن کړي، په نښه شوي دي.

دغه بندیزونه د اسټرالیا هغه مخکېني اقدام ته د مسکو مستقیم ځواب دی، چې پر یوشمېر روسي شرکتونو، ادارو او افرادو یې بندیزونه لګولي دي.

پر دې سربېره روسیې د نیوزیلند د دفاع وزارت د درېیو مرستیالانو په ګډون د دې وزارت پر ۹ چارواکو هم بندیزونه لګولي دي.

پر اوکراین د روسیې د بې‌دلیله یرغل راهیسې اسټرالیا د روسیې په څه باندې زرو شرکتونو او افرادو بندیزونه لګولي، چې نیوزیلند هم د روسیې په وړاندې ورته تګ‌لاره مخته وړې ده.

د ګرجستان ولسمشرې سالومه زورابیشویلي له لوېدیځو هېوادونو وغوښتل چې په واکمن، د ګرجستان خوب ګوند باندې فشار راوړي چې د انتخاباتو نتیجې له سره و ارزوي.

نوموړې پرون سه‌‌شنبې د دې هېواد په پلازمېنه تبلیسي کې د ازادې اروپا/ازادي راډیو د ګرجستان له څانګې سره په مرکه کې همدارنګه وویل، اروپایي او نور غربي شریکان یې باید پر چارواکو سخت فشارونه راوړي ترڅو د شنبې د ورځې د پارلماني انتخاباتو پايلې چې د هغې په خبره غلا شوي، بیا وڅېړي.

مېرمن زورابیشویلي او د اپوزیسیون ګوندونه وایي چې، په دغو انتخاباتو کې لاسوهنه شوې او شاوخوا درې سوه زره رایې د واکمن ګوند په ګټه کارول شوي دي.

دې ګوند ادعا کړي چې شاوخوا ۵۴سلنه رایې یې ګټلي دي.

دغه ادعاوې او د روسیې د مداخلې په اړه تورونه د دې سبب شوي، چې په ګرجستان کې په لسګونو زره کسان د اعتراضونو لپاره واټونو ته راووځي.

د مسکو یوې محکمې د معلوماتي ټکنالوژۍ کارپوه فیروز دادوبایف د خیانت په تور په دیارلس‌نیم کاله بند محکوم کړ.

دادوبایف د روسیې او تاجکستان دوه‌ګونی تابعیت لري.

د روسیې دولتي خبري اژانسونو نن د امنیت د فدرال ادارې FSB په حواله راپور ورکړ چې، دادوبایف د ۲۰۲۲ کال په اکتوبر میاشت کې هغه مهال ونیول شو، چې غوښتل یې د روسیې پټ استخباراتي معلومات په پلازمېنه مسکو کې د امریکا د استخباراتو یوه استازي ته وسپاري.

محکمې همداراز نوموړی د ۳۰۸۰ ډالر معادل د ۳۰۰ زره روسي روبلو د جریمې په ورکولو هم محکوم کړی دی.

وروسته له‌‌دې چې روسیې په ۲۰۲۲ کال کې پر اوکراین یرغل وکړ، په روسیه کې په خیانت د تورنو کسانو قضیې هم زیاتې شوې دي.

ولسمشر ولادیمیر پوتین تېرکال هغه قانون توشیح کړ چې، له‌مخې یې د خیانت په نوم جرمونو ته تر پخوا درنې سزاګانې ورکول کېږي.

پر اوکراین د روسیې له یرغل وروسته د روسیې د شمالي قفقاز چیچنیا سیمه د لومړي ځل لپاره د یوې بې‌پیلوټه الوتکې په وسیله په نښه شوه.

د چیچنیا کریملین پلوي دکتاتور مشر رمضان قدیروف نن پر خپله ټلېګرام پاڼه ولیکل چې، دا بې‌پیلوټه الوتکې په ګودرمس ښار کې د هغه پوځي پوهنتون پر ودانۍ ولګېدلې چې د ولسمشر ولادیمیر پوتین په نوم یادېږي.

دا پوهنتون د اوکراین له سرحد څخه شاوخوا ۵۰۰ کیلومتره لیرې پروت دی.

قدیروف وویل، دې حملې انساني تلفات نه‌دي اړولي او هغه اور چې د ودانۍ پر بام لګېدلی و، وژل شوی دی.

کییف تر اوسه په‌دې اړه څه نه‌دي ویلي.

قدیروف وویل چې، زرګونه روسي ځواکونو مخکې له‌‌دې چې اوکراین ته واستول شي، د چیچنیا په‌دې پوځي پوهنتون کې پوځي زده‌کړې کړې دي.