د اسرایيلي پلیو ځواکونو د غزې په شجاعیه سیمه کې عملیات روان دي، دا هغه سیمه ده چې د اسراییلي ځواکونو په وینا ډیر مخالف وسله وال پکې وژل شوې دي.
فرانس پریس اژانس د شنبې په ورځ وویل چې د غزې ښار ته څیرمه د شجاعیه په سیمه کې د دریمې ورځې په مخه هم د اسراییلي ځواکونو عملیات روان وو. د ملګرو ملتو په باور په دې جګړه ځپلې سیمه کې د ژوند شرایط د زغم وړ نه دي.
د اسراییل پوځ د شنبې په ورځ وویل چې د هوایي ځواکونو په مرسته یې د حماس د وسله والو پرضد په شجاعیه کې دقیق عملیات ترسره کوي. حماس ډلې ته اروپایي ټولنه او د امریکا متحد ایالتونه د ترهګرې ډلې په سترګه ګوري.
په شجاعیه کې جګړه څو میاشتې وروسته تر دې بیا پيل شوه چې د اسراییل پوځ اعلان وکړ چې د حماس د قوماندې جرړې یې د غزې تړانګې په شمال کې ایستلې دي.
فرانسپریس اژانس د شنبې په ورځ یو شمیر ویډیوګانې خپرې کړې چې خلک په لاس ګاډو کې د کورونو وسایل لیږدوي او په دوړو خاور ککړ ماشومان ورسره نورو سیمو ته لیږدي.
د شجاعیه سیمې یوه اوسیدونکي عبدالکریم المملوک فرانس پریس اژانس ته وویل چې په یوه ټانک یې د شهدا له جومات سره سترګې ولګیدې چې ډزې یې کولې.
دیرش کلن محمد احرار هم وایي چې داسې ګومان یې کاوه چې دی او د کورنۍ نر ښځې به یې ووژل شي خو ده د کور هرڅه ته شا کړه او له شجاعیه څخه ووت.
د ملګرو ملتو د بشري چارو د همغږۍ ادارې( اوچا) اټکل کړی دی چې د شپږو او اتو لکو ترمنځ کسان د یوې اونۍ په ترڅ کې له شجاعیه څخه وتلي دي.
په غزه کې پروسږکال د اکتوبر په اوومه وروسته تر دې اسراییلي ځواکونو برید وکړ چې د حماس وسله والو د اسراییل دننه شاوخوا دولس سوه کسان ووژل او شاوخوا دوه سوه څلویښت تنه نور یې برمته کړل.
په غزه کې د حماس تر واک لاندې روغتیا وزارت وایي چې تر اوسه د اسراییلي ځواکونو د بریدونو له امله شاوخوا نهه دیرش زره کسان چې اکثر یې ملکیان دي وژل شوې دي.
د دې جګړې له امله د اسراییل په شمالي سرحدونو کې له لبنان سره نښتې زیاتې شوې دي او ایران اسراییل ته خبرداری ورکړی دی چې پر لبنان برید ونه کړي.