د ملګرو ملتونو د امنیت شورا په پرېکړه لیک کې چې بېګا تصویب شو؛ د روژې په مبارکه میاشت کې د داسې ډزبندۍ غوښتنه شوې چې پایله یې د غزې په تړانګه کې دوامداره او د اوږدې مودې اوربند وي او همداراز حماس او نورې وسله والې ډلې باید هغه اسراییلي وګړي بې له کوم قید و شرطه خوشې کړي چې د اکتوبر د اوومې نېټې په حمله کې یې یرغمل کړي وو.
امنیت شورا د غزې د جګړې له پیله د لومړي ځل لپاره په غزه کې د اوربند په پلوي رایه ورکړه.
دې پرېکړه لیک ته چې طرح یې الجزایر د سویس، سلووینیا، جاپان او جنوبي کوریا په ګډون د څو هېوادو په ملاتړ وړاندې کړې وه، د امنیت شورا له پنځلسو غړو ۱۴ مثبتې رایې ورکړې. متحدو ایالتونو چې د اوربند لپاره پخواني پرېکړه لیکونه یې ویټو کړي وو، دې پرېکړه لیک ته ممتنع رایه ورکړه.
اسراییلو پردې پریکړه لیک خپګان ښودلی او په غبرګون کې یې واشنګټن ته د یوه جګپوړي اسراییلي پلاوي سفر لغوه کړ.
د صدراعظم بنیامین نتنیاهو دفتر په یوه بیان کې وویل چې د امنیت شورا پرېکړې د جګړې او د برمته وو د خوشې کېدو هڅې زیانمنې کړې. نتنیاهو وايي، دا پرېکړه لیک حماس هیله من کوي چې نړیوال فشارونه به دا امکان ورته برابر کړی چې د اسراییلي برمته وو له خوشې کولو پرته اوربند وکړي. خو متحدو ایالتونو وویل چې اوربند یوازې هغه مهال عملي کېدای شي چې حماس د برمته وو خوشې کول پیل کړي.
حماس چې متحدایالات او اروپايي ټولنه یې د یوې تروریستي ډلې په توګه پېژني، د امنیت شورا د پرېکړه لیک هرکلی کړی او ویلي یې دي چې د فلسطیني بندیانو په بدل کې د اسراییلي برمته د خوشې کېدو په اړه خبرو ته چمتو دی.
اروپايي ټولنې هم د امنیت شورا د پرېکړه لیک هرکلی کړی. د دې ټولنې مشرې اورزولا فان دیرلین تېره شپه پر ایکس شبکې ولیکل چې د دې پرېکړه لیک تطبیق د ملکي وګړو د خوندیتوب لپاره ډېر مهم دی. ترکیې د امنیت شورا پرېکړه د غزې تړانګې ته د بشري مرستو د بیا پیلیدو لپاره یو مثبت ګام وباله.
په همدې حال کې د ملګرو ملتونو سرمنشي انتونیوګوتیریش د امنیت شورا د پرېکړې د سمدستي تطبیق غوښتنه کړې. ښاغلي ګوتیریش بېګا پر خپله ایکس پاڼه ولیکل چې دا پرېکړه لیک باید ډېرژر عملي شي او په دې کې پاتې راتلل به د بښنې وړ نه وي. د امنیت شورا پریکړه لیک د غزې په تړانګه کې د بشري ناورین په اړه هم ژوره اندېښنه ښودلې ده.
له بلې خوا سپینې ماڼۍ ویلي دي چې د غزې په جنوبي ښار رفح کې د اسراییلو د پوځي عملیاتو نښې یا پلان نه لیدل کېږي. رفح د مصر سرحد ته نژدې ښار دی چې د غزې د ۲،۳ میلیون خلکو ډېره برخه د اسراییلو د تېرو څو میاشتو حملو له وېرې هلته پناه اخیستې.
