د روژې په میاشت کې د افغانستان په بېلابېلو ولایتونو کې یو شمېر خیریه بنسټونو د مسافرو، د ناروغانو د پایوازانو او بېوزلو ته لپاره د روژه ماتي پروګرامونه جوړ کړي دي.
د پکتیا ولایت اوسېدونکی اصیل خان له خپل ناروغ سره روغتون ته راغلی دی.
هغه ته د لېوال خیریه بنسټ لخوا ورته روژه ماتې ورکړل شوې ده.
اصیل خان وویل: "دلته ناروغانو او پایوازانو ته د ډوډۍ سهولت برابر شوی دی، روژه ماتې ورکوي، ډېر خلک په سهولت کې دي او له منډو او مصارفو څخه خلاص شوي دي."
د لېوال خیریه بنسټ مسوول طلا لېوال وايي، دوی په پکتیا ولایت کې هغو کسانو لپاره روژه ماتی چمتو کوي چې له بېلابېلو ولایتونو او د پکتیا ولایت له بېلابېلو ولسوالیو څخه له ناروغانو سره روغتون ته راغلي وي.
نوموړي ازادي راډیو ته وویل چې دا روژه ماتې په ورځني ډول له ۴۰۰ تر ۵۰۰ د ناروغانو پایوازانو ته برابرېږي.
هغه زیاتوي: "هغه پایوازان چې هلته ورته د ډوډۍ سهولت نه وي او دوی وس او توان نه لري، دوی باور وکړئ د یو بیسکېټ پیسې هم نهلري، موږ روژه ماتې ورته تیاروو."
نوموړي وویل چې د دې تر څنګ دوی د ورځې سلو بېوزلو کورنيو ته د روژه ماتې لپاره وچه ډوډۍ هم وېشي.
د لېوال په خبره تېرو کلونو کې به ډېرو کسانو همکاري کوله، خو سږ کال دا لګښتونه ټول یو هېواد وال په غاړه اخیستي دي.
په ورته وخت کې په ننګرهار ولایت کې هم د یو خیریه بنسټ لخوا د جلال اباد په سیمهییز روغتون کې ناروغانو سره مل پایوازانو ته روژه ماتې ورکول کېږي.
د عطا خیریه بنسټ مسوول عطا الله شګیوال په دې اړه ازاډي راډيو ته وویل: "د ورځې ۸۰۰ تر ۹۰۰ او ۱۰۰۰ کسانو لپاره په ننګرهار سیمهییز روغتون کې د مختلفو ولایتونو او ولسوالیو څخه راغلي ناروغانو او د هغوی سره پایوازانو لپاره د روژه ماتې دا دسترخوان چمتو کېږي."
خو نوموړي په دې اړه چې د دې روه ماتې لګښت د چا لخوا ورکول کېږي، جزییات ورنه کړل.
په روژه کې مسافرو ته د روژه ماتي د چمتو کولو پروګرام د تورخم دروازې ها خوا پاکستان غاړې ته هم د ځايي اوسېدونکو لخوا روان دی.
د دې دسترخوان یو تنظیمونکی اسرار شینواری وايي چې له تېرو درېیو کلونو راهیسې هر کال د روژې په میاشت کې د ورځې شاوخوا زرو کسانو لپاره د یو شمېر خلکو په مرسته او په خپل شخصي لګښت روژه ماتي برابروي.
نوموړي زیاته کړه: "الحمدالله نن موږ سره د خلکو په مرسته د دې دسترخوان چمتو کول روان دي. دلته مسافر، موټر چلوونکي او د دې ځای اوسېدونکي کوم چې مزدوران دي، هغوی لپاره دا بند او بست کوو."
د ننګرهار ولایت اوسېدونکی متین د روژه ماتي دې پروګرام کې ګډون کړی دی.
هغه وویل: "تورخم ته راغلي یو لارۍ والا، موټر چلوونکي یو. دلته د روژه ماتي انتظام یې کړی دی او موږ راغواړي. خدای دې دوی سره ښه وکړي."
د یادونې ده د روژه ماتي دا پروګرامونه داسې مهال دي چې یو شمېر کورنیو تر دې مخکې ازادي راډیو سره په خبرو کې ويلي وو چې د روژې په میاشت کې د خوراکي توکو د پلورلو توان نهلري او په ټوله کې د خلکو د اقتصاد د کمزوري کېدو له امله د زکات ورکولو کچه هم سږ کال د پخوا په پرتله راټيټه شوې ده.
نړیوالو سازمانونو هم په وار وار په افغانستان کې د اقتصادي بحران او د فقر او لوږې د لوړوالي په اړه اندېښنه ښودلې ده.
د ملګرو ملتونو سازمان د معلوماتو له مخې، د افغانستان یو پر درېیمه برخه خلک چې شمېر یې څه باندې ۱۶ میلیونه تنه دی، له لوږې او له دې ډلې درې نیم میلیونه افغانان د خوړو د نه خوندیتوب له بېړني حالت سره مخ دي.
