د افغانستان د کرکټ ملي لوبډله به نن ماسپښین یوه بجه په هند کې د نړیوال جام په درشل کې په خپله دویمه تمریناتي لوبه کې د سریلانکا له لوبډلې سره مخامخ شي.
د افغانستان او جنوبي افریقا لومړۍ تمریناتي لوبه د باران له امله لغوه شوې وه.
د افغانستان د لوبډلې مرستیال روزونکي رئیس احمدزي د نننۍ لوبې د اهمیت په اړه ازادي راډيو ته وویل:
" تمریني لوبې د دې لپاره دي چې د نړۍ له بیلابیلو سیمو څخه راغلې لوبډلې د نړیوال جام سیالیو کې د لوبې کولو دمخه یو بل سره لوبې وکړي ترڅو ځانونه د میدانونو او هوا سره بلد کړي. "
رییس احمدزي زیاته کړه چې افغان لوبډله چمتو ده چې د نړیوال جام سیالیو کې د تېر په پرتله ښه وځلېږي.
اخوا د افغانستان کرکټ بورډ د نړیوال جام په درشل کې د افغان لوبډلې لپاره یو لارښود روزونکی هم ټاکلی دی.
د کرکټ بورډ د بیان په اساس د هند د کرکټ ملي لوبډلې پخوانی کپتان اجی جدیجا به د نړیوال جام د سیالیو پر مهال له افغان لوبغاړو سره د یوه مینټور یا لارښود په صفت دنده ترسره کړي.
د کرېکټ نړیوال جام به د اکټوبر په پنځمه نېټه د انګلستان او نیوزیلنډ تر منځ له لوبې سره پیل شي.
د افغانستان د کرکټ ملي لوبډله به د نړیوال جام په سیالیو کې خپله لومړۍ لوبه د اکټوبر په اوومه د بنګله دیش پر وړاندې ترسره کړي.
په نړیوال جام کې د نړۍ لس غوره لوبډلې برخه اخلي.