د میدان وردګ ولایت لپاره د طالبانو سیمه ییز چارواکي وایي، چې د تېرې شپې د راوتو سېلابونو تلفات ۲۲ تنو ته رسېدلي دي.
طالب چارواکې زیاتوي، چې د سېلاب له امله مړه شوي کسان، په جلریز ولسوالۍ کې د یوه واده د مراسمو ګډونوال وو.
د دغه ولایت لپاره د طبعي پیښو پروړاندي د مبارزې ادارې لپاره د طالبانو د حکومت رئیس مولوي فیض الله جلالي ازادي راډیوته وویل، چې لسګونه کسان لانورهم لادرک دي.
نوموړي وايي،د چک ولسوالۍ د کجیرخیلو کلی کی ۴ تنه ټپیان شوي، چې په ولایتي روغتون کې بستر دي.
جلالي زیات کړه چې د دوي ټیمونه سیمي ته د مرستي لپاره رسیدلي دي.
پر جلریز سربېره د میدان وردګو ولایت په سید اباد، چک، نرخ او جغتو ولسوالیو کې هم سېلابونه راوتلي، چې د ځاني تلفاتو ترڅنګ یې خلکو ته درانه مالي زیانونه اړولي دي.
ځایي چارواکو ویلي، چې یو شمېر کسان لا هم نادرکه دي.
په جلریز ولسوالۍ کې د بامیان د عمومي سړک یو شمېر برخې ویجاړې شوي او د دغه ولایت ځینې نورې سیمه ییزې لارې، استنادي دېوالونه اوکرنیزې ځمکې تخریب شوي.
د طالب چارواکو د معلوماتو له مخې، د ځاني او نورو زیانونو معلومات تراوسه لومړني دي، کېدای شي زیات شي.
د طالبانو د حکومت د طبیعي پېښو پر وړاندې د مبارزې وزارت د معلوماتو له مخې، د روان کال په لومړنیو څه باندې څلورو میاشتو کې، د ټول افغانستان په کچه ۱۵۱ تنه په بېلابېلو طبیعي پېښو کې مړه شوي او ۲۲۵ نور ټپيان شوي دي.
د طالبانو د حکومت دغې ادارې دا هم ویلي، چې په دې موده کې ۲۱۶۲ کورونه په نسبي یا بشپړه توګه ویجاړ شوي هم دي.
د ملګرو ملتونو سازمان، په وروستیو کې افغانستان له نړیوالو منفي اقلیمي اغېزو له درېیو زیاتو زیان ګالو هېوادونو له ډلې یاد کړی.