د ۲۳ کلنو ځوانانو ترمنځ د فوټبال د اسیايي سیالیو د لارموندنې په پړاو کې به افغانستان له ایران، هانګ کانګ او ازبکستان سره سیالي کوي.
د افغانستان فوټبال فدراسیون د خبر پر اساس چې د دې سیالیو د پچه اچونې مراسم نن پنجشنبه د مالیزیا په کولالمپور ښار کې ترسره شول او د افغانستان د ۲۳ کلنو ځوانانو فوټبال لوبډله به په E ګروپ کې سیالي وکړي.
دغه سیالۍ به د راتلونکې سپټمبر میاشتې له ۴مې نېټې څخه د همدې میاشتې تر ۱۲مې نېټې پورې ترسره شي او د افغانستان سیالۍ به په ازبکستان کې کېږي.
د ویلو ده چې د لارموندنې د پړاو غوره لوبډلې به د قطر په کوربهتوب په ۲۰۲۴ کال کې د اسیا د ۲۳ کلنو ځوانانو په سیالیو کې ولوبيږي.