د ښځو ترمنځ د کرېکټ په شل اوریز نړیوال جام کې اسټرالیا په ۵ منډو هندوستان ته ماتې ورکړه او یو وار بیا پایلوبې ته ووتل.
د پنجشنبې په ورځ د فبرورۍ ۲۳مه په لومړۍ نیمه پایلوبه کې اسټرالیا د هند پر وړاندۍ لومړی توپوهنه وکړه او د ۱۷۳ منډو هدف یې وټاکه.
هندۍ لوبډلې یې په ځواب کې د ۸ وېکټو په سوځېدو ۱۶۷ منډې وکړې.
په دې سیالۍ کې بیت موني د اسټرالیا او هرمن پریت کور د هند لپاره نیمه سلیزې ووهلې.
اسټرالیاوۍ اشلي ګارډنر چې د ۳۱ منډو ترڅنګ یې ۲ وېکټې هم اخستې وې د لوبې غوره لوبغاړې ونومول شوه.
په دویمه نیمه پایلوبه هکې چې د جمعې په ورځ د فبرورۍ ۲۴مه به ترسره شي کوربه سویلي افریقا د انګلستان پر وړاندې سیالي کوي.
د ویلو ده چې، د دې نړیوال جام پایلوبه به د روانې میاشتې په ۲۶مه نېټه ترسره شي.