د لاسرسۍ وړ لېنکونه

تازه خبر
یکشنبه ۱۰ تله ۱۴۰۱ کابل ۰۵:۰۴

د امريکا ولسمشر د 'ميخاييل ګورباچوف' پر مړينه خواشيني ښودلې


د پخواني شوروي اتحاد د وروستنی مشر میخاییل ګورباچوف

د پخواني شوروي اتحاد د وروستني مشر میخاییل ګورباچوف په مړینه د امریکا د ولسمشر جو بایډن په شمول د نړۍ مشرانو خواشیني ښکاره کړه.

ښاغلي ګورباچوف تېره شپه له یوې اوږدې ناروغۍ وروسته د مسکو په یوه روغتون کې د ۹۱ کلونو په عمر سا پرې کړه.

ګورباچوف له ۱۹۸۵ تر ۱۹۹۱ پورې د شوروي اتحاد مشر و او په دې موده کې یې ډېره هڅه وکړه چې اصلاحات راوړي، پرانیستې سیاسي فضا رامنځته کړي، له واشنګټن سره د مسکو اړیکې ښې کړي او له افغانستانه د شوروي سور پوځ وباسي.

ګورباچوف همدا راز د ختیځې اروپا په کمونيستي هېوادونو کې په ولسي پاڅونو کې د لاسوهنې مخه ونیوله.

د امریکا ولسمشر جو بایډن په یوه اعلامیه کې ویلي، ګورباچوف راتلونکې متفاوته تصور کړې وه او دا زوړرتیا یې لرله چې داسې راتلونکې ته د رسېدو لپاره خپل موقعیت په خطر کې واچوي.

د امریکا ولسمشر همدا راز ویلي: "د دغو اقداماتو نتیجه خوندي نړۍ او میلیونونو انسانانو ته لا زیاتې ازادۍ وې."

د امريکا د ولسمشر جو بايډن
د امريکا د ولسمشر جو بايډن

میخاییل ګورباچوف د خپل عمر په وروستیو دوو لسیزو کې له سیاسته ګوښه و خو په ۲۰۱۴ کې د روسیې له لوري د کریمیا ټاپووزمې له نیولو او له خپلې خاورې سره د هغې له یو ځای کولو او همدا راز پر اوکراین د روسیې له یرغل وروسته یې پر له‌پسې له مسکو او واشنګټن څخه غوښتنې کولې چې په خپل منځ کې اړیکې ښې کړي.

د ګورباچوف په مړینه د روسیې ولسمشر ولادیمیر پوتین ژوره خواشیني ښوولې ده.

د ښاغلي پوتین وياند انټرفکس خبري اژانس ته ویلي چې، د ټلېګرام له لارې به د ګورباچوف کورنۍ ته غمرازي ولېږي.

د ملګرو ملتو سرمنشي انتوني ګوتریش هم ګورباچوف د داسې سیاستوال په توګه یاد کړ چې د تاریخ لوری یې بدل کړ.

ده ویلي، ګورباچوف تر بل هر چا زیاته هڅه کړې چې سړه جګړه په سوله‌ییز ډول پای ته ورسوي.

د برېتانیا صدراعظم بوریس جانسن ویلي چې، تل یې د سړې جګړې د پای ته رسولو لپاره د ګورباچوف زړه ورتیا او صداقت ستایلی دی.

د اروپايي اتحادیې د کمېسیون مشرې اورزلا فون دیرلین داسې مشر بللی چې د باور او درناوي وړ و.

دې همدا راز ویلي: "ګورباچوف د سړې جګړې په پای ته رسولو او د وسپنیزې پردې په لېرې کولو کې حیاتي رول درلود."

XS
SM
MD
LG