د لاسرسۍ وړ لېنکونه

تازه خبر
شنبه ۱۱ چنګاښ ۱۴۰۱ کابل ۱۲:۲۸

د ايران لخوا پر اټومي انرژۍ د نړيوالو د څار کمولو په اړه غبرګونونه


ايران اټومي بټۍ

فرانسې، بریتانیا او جرمني پرون (پنجشنبې) په یوه ګډه اعلامیه کې د اتومي انرژۍ د نړیوالې ادارې د کمرو او نورو وسایلو د لېرې کولو په اړه د ایران اقدامات وغندل.

دغو درو هېوادونو په خپله اعلامیه کې ویلي چې د ایران وروستي اقدامات له لوېدیځ سره د ۲۰۱۵ د اتومي موافقې د احیا کولو لپاره د ایران د اسلامي جمهوریت اراده له شک سره مخامخوي.

د اروپا دغو درو هېوادونو یا تروییکا همدا راز خبرداری ورکړی چې دا ډول اقدامات به نه یوازې وضعیت سخت کړي بلکې د اتومي موافقې د احیا کېدو لپاره هلې ځلې به ناکامې کړي.

وروسته له دې چې ایران د خپلو درو اتومي سایټونو په اړه د اتومي انرژۍ د نړیوالې ادارې پوښتنو ته په ځواب ویلو کې پاتې راغی او د اتومي انرژۍ د نړیوالې موسسې منصفه پلاوي د ایران په غندنه کې پرېکړه لیک خپور کړ، د ایران حکومت وویل چې د اتومي انرژۍ موسسې کار محدودوي.

د ایران ولسمشر ابراهیم رييسې هم د دې پرېکړه لیک د خپرېدو په غبرګون کې وویل چې اسلامي جمهوریت به له خپلو دریځونو یو ګام شاته نه شي.

د پنجشنبې په ورځ په داسې حال کې د اتومي انرژۍ موسسې په یوه خبرتیا کې وویل چې ایران په خپلو اتومي تاسیساتو کې قصداً د اتومي انرژۍ د نړیوالې موسسې له لوري ایښودل شوي کمرې لېرې کړې.

د اتومي انرژۍ د نړیوالې موسسې عمومي رييس رافایل ګروسي د ایران له لوري دا ډول اقدامات اتومي موافقې ته مرګونی ګوزار وباله، ویې ویل، د ایران تازه اقدامات چې داسې ښکاري د اتومي انرژۍ د منصفه پلاوي نوي پرېکړه لیک ته عکس العمل وي، د اتومي انرژۍ د څارنې د کمېدو سبب کېږي او دا د خواشینۍ وړ ده.

په همدې حال کې د ایران د اتومي پروګرام پر سر د تاوتریخوالي له زیاتېدو سره د امريکا د قواوو مرکزي قوماندانۍ پرون (پنجشنبې) په ورځ پر فارس خلیج د امریکا د دوو ستراتیژیکو الوتکو د الوتنې خبر ورکړ.

سیټکام پر خپله ټویټرپاڼه د دوو بي ۵۲ الوتکو عکسونه هم خپاره کړي دي.

XS
SM
MD
LG