د کونړ د اطلاعاتو و فرهنګ ریاست چارواکي وايي، د دې ولایت د چپې درې ولسوالۍ ځنګلونو کې اور لګېدلی.
د افغانستان طبیعي شتمني، د اور په لمبو کې!
لا د نورستان پر ځنګلونو د لګېدلي اور لمبې سړې نهدي چې د کونړ د چپې درې ولسوالۍ په دوو سیمو کې ځنګل اور اخستی.
د دې ولایت د اطلاعاتو و فرهنګ رییس نجیبالله حنیف ازادي راډیو ته وویل، لومړی ځل اور وړمه ورځ د دیګل په سیمه کې ولګېد، خو د سیمې خلکو یې د پراخېدو مخه ونیوله او خاموش یې کړ.
ښاغلی حنیف زیاتوي، دوهمه اورلګېدنه د لوی خوړ په سیمه کې شوې چې اوس هم بلېږي.
هغه وویل: "دلته اور هم دي، خلک کوښښ کوي چې مخه یې ونیسي او مړ یې کړي."
خو حنیف و نه ویل، چې اور د ځنګله څومره ساحه سېځلې او که یې مخه و نه نیول شي، د څومره سیمې د سوځېدو ګواښ شته.
دا هم روښانه نه ده، چې د دې اور لمن له نورستانه راغځېدلې او که بل کوم لامل لري.
خو له تېرو نږدې لس ورځو راهیسې د نورستان د نورګرام ولسوالۍ د نښترو او ځنغوزیو ډک ځنګلونه د اور سرو لمبو وسېځل.
سیمه کې اوسېدونکو ازادي راډیو ته نن وویل، که څه اوسمهال اور مړ شوی، خو د سکروټو او تودوخې له امله یې د بیا لګېدو احتمال او ګواښ ډېر دی.
د سیمې یو اوسېدونکي صاحب خان همدرد د شنبې په ورځ ازادي راډیو ته وویل، د اور د مهار لپاره ډېر شمېر شنې ونې وهل شوي، څو د پراخېدو مخه یې ونیول شي.
همدرد زیاته کړه: "خو دلته سکروټې لا هم شته او خطرات موجود دي. احتمال د دې شته چې بیا سرایت وکړي. ولې د اوس هغه کوم سرعت یې چې و، هغه کنټرول شوی دی."
هغه تصویرونه چې د سپوږمکۍ له لارې اخستل شوي ښيي چې د نورستان د نورګرام د ځنګل یوه ډېره برخه سوځېدلې.
د نورستان په ځنګلونو کې له تېرو ۹ ورځو راهیسې اور بل و، خو طالب چارواکو ایله تېره ورځ له چین د دې اور د کابو په برخه کې د مرستې غوښتنه وکړه.
ځايي چارواکو دا خبرداری هم ورکړی و، که د نورګرام د نښترو او ځنغوزیو له ونو په ډک ځنګل کې لګېدلی اور مړ نهشي، د کونړ او لغمان ځنګلونه به هم وسیځي.
