د کابل په پلخشتي جومات کې چاودنې ۱۱ تنه ټپیان کړي دي، پېښه نن له غرمې وروسته د ماسپښین د لمانځه پر مهال شوې ده.
په کابل کې د ایمرجنسي روغتون پر خپل ټویټرپاڼه لیکلي چې په کابل ښار کې د نن ورځې د چاودنې له ځایه دغه روغتون ته ۱۱ ټپیان وروړل شوي چې څلور يې تر لومړنۍ درملنې وروسته رخصت شوي او اووه نور بستر شوي دي.
خو د طالبانو امنیتي چارواکو بیا د ټپیانو شمېر شپږ تنه ښودلی، دوی ویلي چې د یو تن روغتیايي وضعیت د اندېښنې وړ دی.
د کابل لپاره د طالبانو د امنیه قوماندانۍ ویاند خالد ځدراڼ ازادي راډیو ته وویل چې د چهارشنبې په ورځ «۱۴۰۱ کال د وري ۱۷» د پلخشتي په جومات کې له غرمې وروسته د ماسپښین د لمانځه پر مهال یو کس پر لمونځ کوونکو لاسي بم غورځولی دی.
ښاغلی ځدراڼ زیاتوي: "په پلخشتي جومات کې له لمانځه وروسته د دعا پر مهال یو چا لاسي بم غورځولی چې له املهيې شپږ تنه ټپيان دي او د پېښې په تور شکمن کس هم نیول شوی دی."
خالد ځدارڼ وايي له دغه کس اوسمهال پوښتنې ګروېږنې روانې دي.
د پېښې یو عیني شاهد نور ساپي ازادي راډيو ته وویل د لمانځه له پای ته رسېدو سره سم د جومات دننه درنه چاودنه وشوه او په جومات کې د لمونځ کوونکو ترمنځ ګډوډي جوړه شوه.
دی وايي: "څنګه چې فرض لمونځ وشو او امام دعا پای ته ورسوله یو ناڅاپه درز شو، چاودنه په لومړیو قطارونو کې وشوه او سخته ګډوډي جوړه شوه."
د پېښې له سیمې پر ټولنیزو رسنیو په خپرو شویو وېډيوګانو کې ښکاري چې یو شمېر ټپيان د خلکو لهخوا په لاسي کراچیو کې روغتونونو ته انتقالېږي.
تر دې دمه د پېښې مسؤلیت کوم چا یا کومې وسلهوالې ډلې نهدی منلی.
دا په داسې حال کې ده چې د روانې اوونۍ د یکشنبې په ورځ د پلخشتي جومات ته څېرمه د اسعارو د بدلېدو په تر ټولو لوی مرکز شهزاده سرای کې هم ورته چاودنه شوې وه چې د ایمرجنسي روغتون د مسؤلینو په وینا له املهيې ۵۸ کسان ټپیان او یو تن ووژل شو، خو د طالبانو حکومت په هغه پېښه کې د ټپیانو شمېر ۱۰ تنه یاد کړی و.
دا خبره په همغه ورځ ایمرجنسي روغتون په خپله ټویټرپاڼه لیکلې وه.
د طالبانو د کورنیو چارو وزارت ویلي و، یو کس چې غوښتلیې له صرافانو څخه پیسې غلا کړي په شهزاده سرای کې لاس بم غورځولی و.