- ګارډین
له بریتانیا خپرېدونکې ورځپاڼې ګارډین "له افغانستان سره د بشردوستانه ژمنو" پر ننني کنفرانس یوه لیکنه کړې ده.
دا کنفرانس په جنوا کې ترسره کېږي او د حکومتونو مشران له افغانستان سره پر مالي او بشري مرستو خبرې پهکې کوي.
د ملګرو ملتونو عمومي منشي انتونیو ګوترش دا مجازي یا انلاین کنفرانس داسې مهال پرانیزي چې د افغانستان حاکمانو د نجونو د منځنۍ او لېسې دورې ښوونځي تر دوهم اعلان پورې ځنډولي دي.
ملګري ملتونه له جرمني، بریتانیا او قطر سره په ګډه د دې کنفرانس کوربهتوب کوي او داسې مهال جوړېږي چې د راپورونو له مخې ۲۳ ملیونه افغانان له شدیدې لوږې سره مخامخ دي.
افغانستان کې دا مهال ۹۵ فیصده خلک کافي خواړه نهلري او شااوخوا ۱۰ ملیونه ماشومان د ژوندي پاته کېدو لپاره بېړنیو مرستو ته اړتیا لري.
د طالبانو په بیا راتګ د افغانستان څه باندې نهه میلیارده ډالره پانګه د امریکا په بانکونو کې کنګل شوه، خو د ګارډین په لیکنه ننني کنفرانس کې په دې اړه خبرې نهکېږي.
د ګارډین په لیکنه هېوادونه نهغواړي چې د افغانستان مرکزي بانک پیاوړی او له خپلو زېرمو ګټه واخلي، ځکه دا کار د طالبانو حکومت ته مشروعیت ورکوي.
- اېسبياېس
د استرالیا خبري شبکې "اېسبياېس" بیا د هغه افغان ډاکتر پر ژوند لیکنه خپره کړې چې د طالبانو له واکمنۍ وروسته هغه هېواد ته انتقال شوی دی.
عبدل ستانکزی د ملبورن ښار د یوې لیلیې په خونه کې ناست او په ټیلیفون کې د خپلې کورنۍ انځورونه ګوري.
د اېسبياېس په لیکنه دا ۳۸ کلن سړی له ۲۰۱۰ نه تر ۲۰۱۴ کال پورې د کابل ایمرجنسي روغتون جراح پاته شوی او د هغو خلکو د ژغورنې لپارهیې نهستړې کېدونکې هلې ځلې کولې چې جګړه کې ښکېل و.
دغې خبري شبکې د استرالیا د طبي ټولنې د مشر عمر خورشید په حواله لیکلي چې د عبدل ستانکزي په څېر افغان ډاکتران د استرالیا له روغتیايي سیستم سره ډېره مرسته کولای شي.
دا په داسې حال کې ده چې پر افغانستان د طالبانو له واکمنېدو راهیسې افغانستان ته نړیوالې مرستې کمې شوي چې ورسره ګڼ شمېر روغتیایي مرکزونه تړل شوي او روغتیايي سیستم کمزوری شوی دی.