په پام کې ده د طالبانو د حکومت د سوداګرۍ او صنعت سرپرست وزیر نور-الدین عزیزي سبا دوشنبې تورخم ته ولاړ شي او د افغانستان او پاکستان د ټرانزیټ او سوداګرۍ پر مسایلو له پاکستاني چارواکو سره خبرې وکړي.
د سوداګرۍ او صنعت وزارت ویاند مولانا زهیر پرون ازادي راډیو سره په خبرو کې د دواړه لورو د خبرو پر اجنډا رڼا واچوله: "د بندرونو د همغږۍ د کمېټې رامنځته کول، د بندرونو تاسیسات، په سیمه ییزو پیسو راکړه-ورکړه او د جلال اباد او پېښور ترمنځ د بسونو د ورځني تګ راتګ موضوعات په دې خبرو کې شامل دي."
پاکستاني رسنیو راپور ورکړی چې دې خبرو کې د پاکستاني پلاوي مشري به د سوداګرۍ او صنعت په چارو کې د صدراعظم مرستیال عبدالرزاق داوود کوي او په غړو کې به یې د افغانستان لپاره د پاکستان ځانګړی استاز محمد صادق هم شامل وي.
نېشن ورځپاڼې راپور ورکړی چې افغان او پاکستاني پلاوي به د تورخم پر لاره د دروازې د پرانېستو د وختونو د زیاتولو، د تاسیساتو د جوړولو، مسافرانو او ناروغانو ته د تګ-راتګ او افغانستان ته د بشري مرستو د استولو لپاره د نورو اسانتیاوو د چمتو کولو پر موضوعاتو بحث وکړي.
نژدې یوه اوونۍ مخکې پاکستاني رسنیو راپور ورکړ چې د پاکستان مرکزي بانک د مالیې وزارت وزارت ته په یو لیک کې غوښتنه کړې چې د ډپلوماټیکو چینلونو له لارې له افغانستان سره د بارتري یا د جنس پر وړاندې د جنس د معاملو په اړه موافقې ته ورسېږي.
دا په داسې حال کې ده چې افغانستان او پاکستان د بهرنیو اسعارو د کمښت له ستونزې سره مخامخ دي.
