د امریکا ولسمشر جو بایډن پر اوکراین د روسیې له حملې وروسته پرون د روسیې پر ضد داسې بندیزونه ولګول چې له کبله یې له روسیې د نړۍ په مهمو اسعارو د راکړې ورکړې امکان اخیستل کېږي.
بایډن په سپینه ماڼۍ کې خبریالانو ته وویل چې د روسیې ولسمشر ولادیمیر پوتین د دیالوګ لپاره د لوېدیځ هڅې رد کړې او د نړیوال قانون سرغړونه یې وکړه، پوتین جګړه انتخاب کړه او اوس باید دی او هېواد یې عواقب وزغمي.
بایدن همداراز وویل چې پر روسیې بندیزونه په داسې ډول تنظیم شوي چې پر روسیې د اوږدې مودې لپاره اغېز ولري خو امریکا او د هغې متحدانو ته یې زیان لږ وي.
ده دا هم وویل چې واشنګټن تیار دی چې نور اقدامات هم وکړي.
روسي ځواکونو پنجشنبه سهار وختي د پوتین تر امر وروسته په اوکراین بریدونه پیل کړل.
د روسیې پوځیانو لومړی د اوکراین ګڼ مهم پوځي تاسیسات په نښه کړل او بیا یې په ښارونو باندې پوځيان هم ور مرش کړل.
د اوکراین ولسمشر ولامیر زیلینسکي په یوه ټلوېزیوني وینا کې د روسیې له خوا د بریدونو له پيله د تلفاتو تازه جزئیات له خلکو سره شریک کړل.
زیلینسکي وویل:" د لومړنیو معلوماتو له مخې، له بده مرغه نن مو د ۱۰ افسرانو په ګډون خپل ۱۳۷ اتلان او خلک له لاسه ورکړي دي. ۳۱۶ نور کسان ټپيان شوي هم دي."
زیلینسکي وویل په کېف کې پاتې کېږي سره له دې چې دی او کورنۍ یې د روسانو مهم هدف هم دي.
اوکرایني چارواکو پرون وویل هر هغه څوک چې د خپلې خاورې د دفاع لپاره وسله غواړي دوی یې ورکوي.
زیلینسکي وویل سره له دې چې روسي پوځیان وايي یواځې پوځي اهداف یې په نښه کړي خو د اوکراین ملکیان هم په نښه شوي.
په اوکراین د روسیې دغه پوځي اقدام په ټوله نړۍ کې غصه او غندنه راپارولې ده.