د غور ځايي چارواکي وايي، له کابله د طالبانو د حکومت یو پلاوی چې د یونسکو استازی هم ورسره ملګری دی، د جام منار د وضعیت د ارزولو لپاره غور ته ورغلی دی.
دا منار چې د ډیلي له قطب مناره وروسته د نړۍ دوهم پخوانۍ د خښتو منار دی، د نړېدو له خطر سره مخامخ شوی دی.
د غور ولایت لپاره د طالبانو د اطلاعاتو او کلتور سرپرست عبدالحی زعیم ازادي راډیو ته وویل، د اطلاعاتو او فرهنګ، ښار جوړونې، د کلیو د پراختیا او یونسکو د استازو په ګډون پلاوي غور ته سفر کړی دی.
دی وايي: "د اسلامي امارت د لرغون پېژندنې ريیس ذبیح الله سادات د کلیو د پراختیا وزارت او نورو ادارو له یوه پلاوي سره چې د یونسکو استازی هم ورسره مل دی، غور ته راغلي دي."
د غور جام منار چې له څنګه یې سیند بهیږي، نه یوازې اوبو یې بنسټونه توږلي بلکې وروستۍ زلزلې لا نور زیانګالی کړی دی.
زعیم هم دې ټکي ته په اشارې وویل، وروستۍ زلزلې د دې منار د یوې اصلي برخې او هغه خښتې چې د دې منار د ساتنې لپاره اېښودل شوې وې غورځولي او اوبه یې لاندنۍ برخې ته تللي دی.
د لرغونو اثارو متخصصان وايي، د جام د تاریخي منار د ساتنې لپاره په اوسنیو شرایطو کې باید د منار شااوخوا ته قوي استنادي دیوالونه جوړ شي، څو دغه منار له سقوطه وژغورل شي او هغه تیږې چې تېرو سیلابونو د دې منار لاندنۍ برخې ته راوړې لیرې شي، بله د حل لاره دا ده چې د منار شااوخوا ته یوه داسې خوازه جوړه شي چې اوبه د دې جام لاندنیو برخو ته لاړې نه شي.
د غور یو فرهنګي نبي ساقي بیا وايي، د جام منار د ساتنې لپاره باید هغه ته نژدې د غټو موټرو د تګ راتګ مخه ونیول شي.
جام منار په ۱۱۹۴ میلادي کال کې د سلطان غیاث الدین غوري له خوا جوړ شو چې۶۳ متره لوړوالی لري.
دغه منار د شهرک په ولسوالۍ کې دی او په ۲۰۰۲ کال کې د یونسکو د فرهنګي او علمي سازمان له لوري د نړیوالو میراثونو په فهرست کې شامل شو.