د افغانستان د بیا رغونې د ځانګړي سرپلټونکي اداره سیګار وايي په افغانستان کې به د خلکو عواید څه کم نیمايي ته راکم شي.
سیګار پرون په یوه ټویټ کې ویلي، په ۲۰۱۲کال کې په افغانستان کې د یوه کس کلنی عاید۶۵۰ ډالره و چې په ۲۰۲۰کال کې ۵۰۰ ډالرو ته راکم شو.
د سیګار د ارقامو له مخې، اوس اټکل دا دی چې په ۲۰۲۲کال کې به دغه عواید ۳۵۰ ته راکم شي.
په ۲۰۲۱م کال کې د افغانستان د اقتصادي رکود په اړه اټکلونه شوي وو چې هغه وخت د ملګرو ملتونو پراختیايي پروګرام (UNDP) او دپیسو نړیوال صندوق (IMF) ویلي وو، د افغانستان ناخالص داخلي تولیدات به له ۲۰ تر ۳۰ فیصدو راکم شي.
سیګار په هغه ۵۱ مخیز راپور کې چې د ۲۰۲۲کال د جنورۍ میاشتې پر ۳۰ یې کانګرس ته لېږلی ویلي و د افغانستان د ناخالصو داخلي تولیداتو ارزښت په ۲۰۲۰کال کې ۲۰ میلیارد ډالرو ته رسېده، خو وروسته له هغې چې طالبانو د ۲۰۲۱کال د اګست په نیمايي کې پر افغانستان ولکه ټینګه کړه، دغه اندازه ۱۶ میلیارد ډالرو ته راکمه شوه.
سیګار ویلي، د اسیا پراختیايي بانک تر ټولو بده سناریو دا ګڼلې چې ممکن په افغانستان کې په لنډه موده کې د وزګارتیا اندازه ۴۰فیصده زیاته، په څنګ کې د کورنیو لګښتونه ۴۴ فیصده راکم شي.
پر افغانستان د طالبانو د ولکې له ټینګولو وروسته د ډالرو په وړاندې د افغانیو ارزښت هم ټیټ شوی او زیات خلک وايي، چې د خپلو کورنیو غړو د نسونو مړونو ته حیران دي.
د طالبانو ویندویانو مخکې ویلي وو دوی هڅه کوي له ګاونډیو او نورو هېوادونو بشري مرستې ترلاسه او د اقتصادي ستونزو په حل کې برخه واخلي.
د امریکا د نیویارک ټایمز ورځپاڼې له یوه راپور سره سم په تېرو څه باندې شپږو میاشتو کې د اقتصادي زوال له ډاره څه باندې یو ملیون کسان له افغانستانه نورو هېوادونو ته کډوال شوي دي.