د لاسرسۍ وړ لېنکونه

تازه خبر
پنجشنبه ۹ وری ۱۴۰۳ کابل ۱۱:۱۹

په بامیانو کې د خپلسرو کېندنو په اړه د لرغونو اثارو د متخصصانو اندېښنې


بامیان
بامیان

راپورونه وايي چې د بامیان په دره کې د نا پېژندل شویو کسانو له لوري خپلسرو کېندنو او د تعمیراتي کارونو چټکتیا د لرغونو اثارو متخصصان اندېښمن کړي دي.

دا سیمه، چې د بودا د دوو سترو نړول شویو مجسمو صلصال او شمامه ځای او شااوخوا سیمې یې په کې شاملېږي، په ۲۰۰۳کال کې د یونسکو له لوري نړیوال میراث اعلان شوې ده.

په دې ځای کې د ودانیو پر له پسې جوړېدو او همداراز خپلسرو کېندونو دا خطر پیدا کړی چې د نړېدلو مجسمو شااوخوا غونډۍ یو مخ ونړېږي.

په بامیانو کې د بودا مجسمې
په بامیانو کې د بودا مجسمې

د لرغونو اثارو متخصصان وايي، که دا غونډۍ ونړېده، د بامیان لرغوني اثار به چې د نړیوال میراث برخه دي، له منځه لاړ شي.

د بامیان لپاره د یونسکو پخوانی همغږوونکی غلام رضا محمدي وايي، دوی د طالبانو له لوري د بودا د دوو مجسمو د نړولو لپاره د ۲۰۰۱ کال د چاودنو جاج اخیستی چې له کبله یې په پرښه کې تر ۳۰ مترو پورې ژور درزونه جوړ شوي دي.

محمدي، چې د طالبانو له واک ته رسېدو وروسته جرمني ته تللی، ارټ نیوز پیپر خپرونې ته یې ویلي چې د ژمي په موسم کې واورې او اوبه سمڅو او درزونو ته ننوځي او له دې سره هم مهاله په شااوخوا کې کېندنې به دا دره کاملاً ونړوي.

XS
SM
MD
LG