د رایان اورام په نوم ماشوم چې د پنځو کلونو دی، د پنځو ورځو لپاره د چیفچاوین سیمې د اغران کلي په څاه کې پاتې و.
دغه ماشوم تېره سې شنبه څاه ته ولوېد چې د مراکش په ټول شمال کې د ژغورنې د پراخو هڅو سبب شو.
د ژغورنې د هڅو پر مهال هم په ساحه کې په سلګونو کسان راغونډ شوي وو او د مراکش تر څنګ د نړۍ په نورو برخو کې هم په ټولنیزو شبکو کې هم د رایان وژغورئ په نوم هشتګ ډېر لاس په لاس کېده.
دوی د ماشوم خوندیتوب ته اندېښمن وو.
اوس په ټولنیزو شبکو کې په خپرو شویو تصاویرو کې د پېښې په ساحه کې د دغه ماشوم مړی لېدل کېږي، چې تازه له څاه اېستل شوی دی.
شااوخوا په سلګونو خوابدي ژغورندویان او نندارچیان لېدل کېدل، چې دعا یې کوله او د خپلو ټلیفونونو څراغونه یې روښانه کړي وو او په هوا کې یې خوځول.
د مراکش پاچا محمد، په هغه اعلامیه کې چې دولتي رسنیو خپره کړې، د ماشوم له مور و پلار سره خواخوږي ښوولې ده.
د رسنیو د راپورونو له مخې د رایان پلار د پېښې په وخت کې د څاه په جوړولو بوخت و چې زوی یې ور ولوېد.
دغه څاه ۳۲ متره ژوره وه چې شااوخوا یې نرمه خاوره وه، ځکه نو ژغورونکي له ستونزو سره مخامخ وو.
دوی د ځمکې تر کېندلو وروسته څاه ته یوه کمره داخله کړله او په لومړیو ورځو کې یې د رایان د سلامتۍ خبر ورکړی و.
ژغورونکي توانېدلي وو چې د سمڅې له لارې دغه ماشوم ته اوبه او خواړه ورسوي.
د دغه ماشوم مړینه په مراکش او د نړۍ په نورو برخو کې د ګڼو کسانو د عکس العمل سبب شوې ده، له دې جملې د فرانسې ولسمشر امانویل مکرون په خپله رسمي فېسبوک پاڼه کې لیکلي چې د ماشوم له کورنۍ او د مراکش له خلکو سره خواخوږي ښيي او د فرانسې خلک یې په ویر کې شریک دي.