د سره صلیب نړیواله کمېټه یا 'ICRC'وايي چې د افغانستان د اقتصادي سیسټم د سقوط د مخنیوي لپاره هڅه کوي.
په افغانستان کې د دې کمېټې مشر ایلوی فیلیون پرون پر ټویټر په یو بیان کې ولیکل چې 'ICRC' هڅه کوي د روغتیا د برخې کار کوونکي د افغانستان خلکو ته د حیاتي خدمتونو د وړاندې کولو په برخه کې کار ته دوام ورکړي.
د خوړو نړیوال پروګرام ویلي، د افغانستان له نیمايي زیات وګړي له لوږې سره مخامخ دي او سمدستي مرستو ته اړتیا لري او د ملګرو ملتونو سرمنشي انتونیو ګوترېش په روانه اوونۍ کې وویل، د افغانستان اقتصاد د سقوط په حال کې دی او د ژغورلو لپاره یې باید ژر تر ژر هلته نغدې پیسې ورسول شي.
ګوترېش خبرداری ورکړ چې وخت مهم دی او که چټک اقدام ونه شي نو ناوړه عواقب له ولري.
ملګري ملتونو له څو اوونیو راهیسې په منظم ډول میلیونونه ډالر افغانستان ته لېږي او د افغانستان د نړیوال بانک له لارې یې په خپلو څانګو وېشي، څو له خلکو سره د مرستو په پروګرامونو یې ولګوي.
همدا راز یونېسف په ځینو ولایتونو کې د اړینو مرستو او صحي خدماتو سیار ټيمونه او د نغدي پيسو د وېش پروګرامونه پيل کړي دي.
خو په افغانستان کې د سره صلیب د نړیوالې کمېټې مشر په خپل پروني ټویت کې ویلي چې بشري هڅې د عامه خدماتو د سکتور د سقوط تشه نه شي ډکولی، نو ځکه دی وايي چې په افغانستان کې باید تر دې زیات کار وشي.
