د کرونا ويروس د مثبتو پېښو زیاتېدو له کبله د هند د ټاکنو کمېسیون په پنځو ایالاتونو کې پر سیاسي لاریونونو او کمپایني غونډو بندیز تمدید کړ.
په همدې حال کې چې چین په پلازمېنه پیکنګ کې د کرونا ویروس د بدلې شوې بڼې اومېکرن د لومړۍ مثبتې پېښې راپور ورکړ.
په هند کې په تمدید شوي بندیز کې په سرپټو ځایونو کې د سیاسي ګوندونو پر هغو مناسبتونو او غونډو بندیز شامل نه دی چې تر ۳۰۰ لږ کسان په کې راغونډېږي.
دغه بندیز به د جنورۍ تر ۲۲مې روان وي.
په پنځو ایالاتونو کې به د اسامبلۍ لپاره ټاکنې په اوو پړاوونو کې د فبرورۍ له لسمې د مارچ تر اوومې ترسره کېږي.
په هند کې پرون د ۲۴ ساعتونو په لړ کې د کرونا ویروس د دوه لکه اته شپېته زرو ۸۳۳ مثبتو پېښو راپور ورکړل شو.