د لاسرسۍ وړ لېنکونه

تازه خبر
شنبه ۹ سلواغه ۱۴۰۰ کابل ۰۰:۲۱

ازبیکستان ته د الوتکو په اړه د طالبانو خبرداری او د برېښنا کمبود


ارشیف، د برېښنا یوه ستنه
  • لاس انجلس ټایمز

لاس انجلس ټایمز ورځپاڼې د ملګروملتونو د سرمنشي خبره را سپړلې ده چې ویلي یې دي په میلیونونو افغانان د بشري ناورین له امله د مرګ له خطر سره مخامخ دي.

انتونیو ګوتیرش له نړیوالې ټولنې هیله کړې ده چې د ملګرو ملتونو د پنځه میلیارډه ډالرو مرستو غوښتنه ومني، د افغانستان کنګل شوې شتمنۍ ازادې کړي، څو د دغه هېواد بانکي سیسټم د پیسو د ورکړې له لارې فعاله کړي او د اقتصادي – اجتماعي ناورین مخه ونیسي.

ورځپاڼه لیکي:

د افغانستان اقتصاد چې تر ډېره په نړیوالو مرستو ولاړ و، د امریکایي او ناټو ځواکونو له وتلو وروسته او د طالبانو تر واکمنۍ را وروسته د یو مخ ماتېدو په درشل کې دی.

لاس انجلس ټایمز د خپرې کړې مقالې په بله برخه کې لیکي چې د لوږې له زیاتېدو او په افغانستان کې د اقتصادي وضعیت له خرابېدو سره ځینې اړمنې کورنۍ دې ته هم چمتو شوي دي چې خپل ماشومان وپلوري.

یوه مساله چې د ورځپاڼې پام یې جلب کړی دی، هغه د قندي ګل کیسه ده چې دا لس کلنه پیغله په هرات کې خپل پلار پلورلې ده.

د دې نجلۍ مور ویلي دي چې پرته له دې چې د دې مېړه څه ورته ووایي، قندي ګل یې د پیسو په بدل کې یوه سړي ته په نامه کړه او ویې ویل چې په دې ډول غواړم د خپلو نورو شپږو ماشومانو ژوند وژغورم.

  • ډپلوماټ خپرونه

ډپلوماټ خپرونې په افغانستان کې د برېښنا مساله رااخیستې ده او د طالبانو د رژیم د دفاع د سرپرست وزیر خبرو ته یې اشاره کړې ده.

د مقالې په پيل کې راغلي دي چې د ازبیکستان شپېته فیصده وارداتي برېښنا پر افغانستان قطع شوې ده او ظاهراً ویل کېږي چې تخنیکي ستونزه ده.

خپرونه د برېښنا شرکت د پخواني اجراییه رییس صفي الله احمدزي په وینا لیکي: افغانستان یو زر او شپږ سوه مېګا واټه برېښنا ته اړتیا لري، خو دا هېواد یوازې د ۲۲ سلنه اړتیا د تولید ظرفیت د اوس لپاره لري او نوره برېښنا له څلورو ګاونډیو، ازبیکستان، تاجکستان، ترکمنستان او ایرانه واردوي.

د اکتوبر په میاشت کې برېښنا شرکت د ملګرو ملتونو له ماموریت (یوناما) څخه غوښتي و چې د برېښنا د درې میاشتو پور د ورکړې لپاره له دې شرکت سره نوي میلیونه ډالر مرسته وکړي.

ډپلوماټ لیکي، داسې ښکاري چې برېښنا شرکت دا پیسې نه دي ترلاسه کړي.

خپرونه وړاندې لیکي چې افغانستان ته د ازبیکستان د برېښنا په صادراتو کې په داسې وخت کې کمبود راغلی دی چې د طالبانو د دفاع سرپرست وزیر مولوي محمد یعقوب ازبیکستان ته خبرداری ورکړ.

ده تېره اوونۍ ازبیکستان او تاجکستان ته خبرداری ورکړ چې د افغانستان د هوایي ځواک الوتکې دې بېرته افغانستان ته وسپاري.

د راپورونو له مخې د افغانستان څلویښت الوتکې او هلیکوپټرې وروسته تردې ازبیکستان او تاجکستان ته انتقال شوي دي چې طالبانو د اګسټ په پنځلسمه کابل ونیو.

ډپلوماټ د ځینو کتونکو په وینا لیکي چې د ازبیکستان د برېښنا د صادراتو کمېدل د مولوي یعقوب له خبرو سره تړاو لري، خو د خپرونې په وینا ظاهراً داسې ښکاري چې ازبیکستان او تاجکستان غواړي چې د طالبانو له رژیم سره یو ډول تفاهم وکړي، ځکه چې د طالبانو حکومت برېښنا ته اړتیا لري او دا دوه هېوادونه پیسو ته ان که دا پیسې په ځنډ هم ور وسپارل شي.

XS
SM
MD
LG