د پاکستان د بهرنیو چارو وزیر شاه محمود قریشي له افغانستان سره د ډیورند پر کرښه د اغزن سیم د نصبولو پر وړاندې د ځینو ستونزو یادونه وکړه او ادعا یې وکړه چې ځینې افراد چې نوموړي شر اچونکي وبلل، غواړي چې له دغه وضعیته ناوړه ګټه پورته کړي.
قریشي زیاته کړه: "موږ بوخت یو او له ډپلوماټیکو لارو ځینې ستونزې چې پیدا شوي، هغه له منځه وړو. ځینې افراد شته چې غواړي دا مساله لویه کړي. دې برخه کې شر اچونه د پاکستان په ګټه نه ده، خو له هغه څه به چې زموږ ګټې په کې نغښتې وي، ساتنه وکړو."
ښاغلي قریشي د هغې ویډیو په اړه چې په ټولنیزو رسنیو خپره شوې او په کې ښکاري چې طالبان اغزن سیم ویجاړوي، د یوې پوښتنې په ځواب کې وویل، دغه ویډیو کې ادعا شوې چې اغزن سیم د افغانستان د خاورې دننه نصب شوی و.
د طالبانو د حکومت چارواکي د ازادي راډیو له پرله پسې تماسونو سره-سره حاضر نه شول چې د پاکستان د بهرنیو چارو د وزیر د دغو څرګندونو پر وړاندې غبرګون وښیي.
خو څو رسنیو د طالبانو د دفاع وزارت د ویاند عنایت الله خوارزمي له قوله خبر ورکړی چې ویلي یې دي، پاکستان حق نه لري چې پوله وویشي. هغه دغه اقدام یو نامناسب حرکت او د قانون خلاف یاد کړی دی.
له بلې خوا د طالبانو ویاند او د اطلاعاتو او فرهنګ وزارت مرستیال ذبیح الله مجاهد ویلي، د دې اړتیا نشته چې پاکستان د ډیورند پر کرښه د اغزن سیم غزولو او امنیتي موانعو جوړولو لپاره اقدام وکړي، ځکه د ده په وینا د ډیورند مساله تر اوسه نه ده حل شوې. پاکستانۍ ډان ورځپاڼې راپور ورکړی چې د پاکستان له خوا په سرحدي سیمو کې د اغزن سیم غزول او امنیتي موانعو جوړول په افغانستان کې د تېر حکومت په دوره کې د کابل او اسلام آباد ترمنځ د ترینګلو اړیکو یو اصلي ټکی و.
د طالبانو چارواکي هم لکه د افغانستان د پخواني حکومت د چارواکو په څېر، د ډیورند کرښه د دواړو هېوادونو ترمنځ یوه ساختګي پوله بولي، خو پاکستان هغه له افغانستان سره رسمي پوله ګڼي او تل یې ټینګار کړی چې د تاریخ دا پاڼه اړول شوې.
د ډیورڼد معاهده په ۱۸۹۳ کال د افغانستان د وخت د پاچا امیر عبدالرحمن خان او د بریتانوي هند د بهرنیو چارو د وزیر مورتیمیر ترمنځ لاسلیک شوې.
پاکستان د دې ۲۶۰۰ کیلومتره پولې په ډېره برخه کې اغزن سیم غزولی او ویلي یې دي چې دا کار به د امنیت له ټینګښت سره مرسته وکړي او یو د بل خاورې ته به د سخت دریځو وسله والو د اوښتو مخه ونیسي.
د دې هېواد چارواکو په دې وروستیو کې ویلي چې پر دې پوله د امنیتي موانعو د جوړولو کار په سلو کې نوي بشپړ شوی دی.
د پاکستان د دغه اقدام پر وړاندې افغانستان تل خپل د اعتراض غږ اوچت کړی دی.