د لاسرسۍ وړ لېنکونه

تازه خبر
سه شنبه ۱۶ لیندۍ ۱۴۰۰ کابل ۰۵:۰۰

هالنډ کې بیا د کرونا د بندیزونو پرسر اعتراض کوونکي او پولیس سره ونښتل


هالنډ کې لاریون کوونکي

هالنډ تېر ماښام یو ځل بیا د کرونا وبا د بندیزونو پر ضد د لاریونونو شاهد و .

لاریون کوونکو په هاګ ښار کې پر سړکونو اورونه بل کړل، پولیس یې په ډبرو ایستل او اور شیندونکې پټاقۍ یې چوولې.

له دې یوه ورځ مخکې د هالنډ بل ښار روتردام کې هم مظاهره وشوه.پر دې سربېره پلازمېنه امستردام او بریدا ښارونه هم د ګډوډیو شاهدان وو.

په هالنډ کې دا مظاهرې وروسته تردې پيل شوي چې حکومت یې د کرونا د پېښو د زیاتوالي له کبله تېره شنبه نسبي قرنطین یا ټولبند اعلان کړ.

هالنډ پلان لري چې هغه کسان اوس ځینو سیمو ته له تګه منعه کړي چې د کرونا واکسین یې نه دی کړی.

پر هالنډ سربېره د اروپا یو شمېر نور ښارونه هم له څو ورځو راهیسې د ورته مظاهرو شاهدان دي او لسګونه زره کسان له نویو بندیزونو سره مخالفت ښيي.

دوی د بندیزونو ضد شعارونه له ځان سره لېږدوي او غوښتنه کوي چې ازاد ژوند باید ولري.

پرون په اتریش کې هم شااوخوا ۳۰ زره کسانو مظاهره وکړه، دا وروسته تردې چې د لویدېځې اروپا دا هېواد د کرونا د مهارولو لپاره سر له سبا قرنطین عملي کوي.

پر اتریش سربېره چک جمهوریت کې هم پرون زرګونه کسانو د لګول شوېو بندیزونو پر ضد غږ اوچت کړ.

دغه هېواد کې هم سر له سبا په هغو کسانو یو لړ بندیزونه لګول کېږي چې د کرونا واکسین یې نه دی کړی.

په ټوله کې د روغتیا نړیوال سازمان هم په اروپا کې د کووېډ-۱۹ مثبتو پېښو ته اندېښمن دی او خبرداری یې ورکړی، که بېړني اقدامات ونه شي، تر راتلونکي پسرلي به پنځه لکه نور کسان هم پر دې ناروغۍ مړه شي.

XS
SM
MD
LG