په اروپا او شمالي امریکا کې څېړونکو په نویو څېړنو کې دې ته پام شوی چې د مارغانو غږونه په طبیعت کې کم شوي دي.
د فرانسې لیمونډ ورځپاڼې ته کتونکي فاهي تیرمیناسیان ویلي دي، کله چې د ښار اوسېدونکي غواړي چې له طبیعت سره په ارتباط کې شي، نو تر هڅه مخکې باغونو ته مخه کوي او کلیو بانډو ته ځي، هلتهیې په ځانګړي ډول د مارغانو غږونو ته ورپام کېږي، خو داسې ښکاري چې دا اوازونه له طبیعته په کمېدو دي.
یوې نړیوالې څېړونکې ډلې په شمالي امریکا او اروپا کې د تېرو ۲۵ کلونو په ترڅ کې د طبیعت د غږونو په اړه څېړنه کړې ده چې نیچر کامونېکېشن مجلې خپره کړې ده.
د بریتانیا په ایست انګلیا پوهنتون کې سایمون بټلر او د ده همکارانو په شمالي امریکا او اروپا کې په دوه لکه ځایونو کې د مارغانو غږونه ثبت کړي او وایي چې له بده مرغه د دوی لاسته راړونې ښې نهدي او هر پسرلی ورو ورو دا غږونه کمېږي.
نیمه پېړۍ مخکې داسې مدني هڅې وشوې چې مارغان وساتل شي، دې فعالانو به په اروپا کې د څلور کیلومتره مربع په یوه مساحت کې مارغان څارل.
په فرانسه کې د تېرو ۳۲ کلونو په ترڅ کې د مارغانو لپاره ۲،۹۰۰ ځایونه ځانګړي شوي او د ځینو څېړونکو په وینا دا ډول طبیعي پارکونه هم د دې لامل شوي چې په کلیو بانډو کې د مارغانو شمېر کم شي.
نشنل جیوګرافیک سږ کال یوه څېړنه خپره کړه چې د هغې له مخې په نړۍ کې د ۵۰ او ۴۳۰ میلیارده ترمنځ مارغان ژوند کوي. په دوی کې تر ټولو ډېرې کورنۍ مرغۍ دي چې شااوخوا ۱،۶ میلیاردو ته رسېږي.