افغان کرکټ بورډ وايي، ملي لوبډله له پوره چمتوالي او لوړ مرام سره په نړیوال جام کې ګډون کوي.
د کرکټ بورډ ویاند فرید هوتک ازادي راډيو ته وویل چې د وېسټ انډیز پر وړاندې د تېرې شپې بریا د افغان لوبغاړو مورال لوړ کړی او هیله شته چې د نړیوال جام په رسمي لوبو کې به ښې لاس ته راوړنې ولري.
د کرکټ ملي لوبډلې تېره شپه په خپله دویمه تمریني لوبه کې د ويسټ اندیز لوبډلې ته په ۵۶ منډو ماتې ورکړه.
د لوبې پچه افغانستان وګټله او لومړی یې د توپ وهنې پرېکړه وکړه.
افغان لوبډلې د محمد شهزاد او حضرت الله ځاځي د پنځوسیزو پر مت ويسټ انډیز لوبډلې ته د ۱۹۰ منډو هدف کېښود، خو د وېسټ انډیز لوبډلې یاد هدف پوره نه کړ او په شل اورونو کې د پنځو لوبغاړو په سوځېدو سره یې ۱۳۳ منډې وکړې.
کېپتان محمد نبي په څلورو اورونو کې د دوو منډو په ورکولو سره درې لوبغاړي وسوځول او لوبه افغانستان په ۵۶ منډو وګټله.
افغانستان تر دې دمخه خپله لومړنۍ تمریناتي لوبه جنوبي افریقا ته بایللې وه.
د ویسټ انډیز پر وړاندې له بریا وروسته د افغانستان د کرکټ بورډ ویاند فرید هوتک ازادي راډیو ته وویل چې ملي لوبډله به له پوره چمتوالي او لوړ مرام سره په نړیوال جام کې ګډون وکړي.
د افغانستان کرکټ ملي لوبډله به په خپل ګروپ کې د هند، پاکستان او نیوزیلنډ له مخکښو لوبډلو سره مخامخ شي.