د امریکا د متحدو ایالاتونو د بهرنیو چارو وزیر انتوني بلېنکن چې په نرم مزاج مشهور دی، د دویمې ورځې لپاره هم کانګرس ته حاضرېږي او هلته به پوښتنو ته ځوابونه وايي.
هغه پرون دوشنبه د استازو جرګې د بهرنیو چارو کمېټه کې سختو پوښتنو ته ځوابونه وویل او نن سې شنبه(د وږي۲۳مه) د مشرانو جرګې د بهرنیو اړیکو په کمېټه کې هم پوښتنو ته ځوابونه ووايي.
وروسته له هغې چې وسله والو طالبانو پر افغانستان ولکه ټینګه کړې، دا لومړی وار دی چې د امریکا د حکومت یو لوړ رتبه چارواکی په کانګرس کې په دې اړه پوښتنې ځوابوي.
له دې سره به په کانګرس کې د مخالف ګوند، جمهوریت غوښتونکو غړو ته چانس په لاس ورځي په افغانستان کې د امریکا د شل کلن پوځي ماموریت د ختمېدو او پر افغانستان په ناڅاپي ډول د طالبانو د واکمنېدو په اړه د ډموکرات جو بایډن اداره چلنج کړي.
انتوني بلېنکن د استازو جرګې د بهرنیو چارو کمېټې ته وویل، د بایډن ادارې د امریکايي وګړو پر خوندیتوب ډېر تمرکز درلود او بېلابېلو سناریوګانو ته پام سره یې تل دا ارزول چې د لویدیځ له ملاتړه برخمن افغان حکومت په څه ډول دوام وکړي.
د بلېنکن په وینا کې چې یوه کاپي یې تر پرونۍ جلسې مخکې د فرانسې خبري اژانس ته په لاس ورغلې ویل شوي، ان په ډېرو بدبینانه ارزونو کې هم اټکل نه کېده چې د افغانستان دولتي ځواکونه به په داسې حال کې ړنګېږي چې امریکايي ځواکونه لا هلته حضور لري.
د استازو جرګي جمهوريپال غړي مایک واتځ (Mike Waltz) او جمهوريپال سناتور لندسي ګراهام (Lindsey Graham) تېره اوونۍ په یوه ګډه اعلامیه کې ویلي وو: "دا د توجیه وړ نه ده چې د بایډن اداره دې یوه تروریستي رژیم ته زمینه برابره کړي، څو داسې شرایط وضعه کړي چې امریکايي وګړي یا خپله یا له خپلو کورنیو سره له هغه هېواده ووځي."
د امریکا د بهرنیو چارو وزیر انتوني بلېنکن په خپله وینا کې ټینګار کړی چې له افغانستانه د امریکايي ځواکونو د وتلو موضوع پخواني جمهوریپال ولسمشر ډونالډ ټرمپ له طالبانو سره په موافقه کې منلې وه.
په افغانستان کې د امریکا د تاریخ تر ټولو اوږده جګړه د پخواني ولسمشر جورج ډبلیو بوش په واکمنۍ کې پیل، د بارک اوباما او ډونالډ ټرمپ په واکمنیو کې یې دوام وکړ او د جو بایډن ادارې پر مهال ختمه شوه چې ورسره جوخت طالبانو هم بېرته پر افغانستان ولکه ټینګه کړه چې له کبله یې د بایډن پر ادارې انتقادونه شوي دي.