د لاسرسۍ وړ لېنکونه

تازه خبر
جمعه ۲ تله ۱۴۰۰ کابل ۰۴:۰۶

صرافان: هېواد کې د اسعارو د بدلولو ټول بازارونو خپل فعالیتونه بیا پیل کړل


د شهزاده سرای

د افغانستان د صرافانو سراسري اتحادیې له درې اونۍ ځنډ وروسته د شنبې په ورځ خپل فعالیتونه له سره پیل کړل.

د صرافانو د سراسري اتحادیې مرستیال حاجي دادګل ازادي راډیو ته وویل چې په ټول هېواد کې د اسعارو د بدلولو ټول بازارونو خپل فعالیتونه له سره پیل کړي دي.

نوموړي زیاته کړه: "په شهزاده سرای او ټول افغانستان کې د صرافۍ فعالیتونه بیا پیل شوي. موږ خپلو اتباعو ته د خدماتو وړاندې کولو ته ژمن یو. په ضمن کې له مرکزي بانک سره په اړېکه کې یو له دوی مو غوښتنه کړې چې د بانکونو نمایندګۍ دې هم خپل فعالیتونه په شهزاده سرای کې پیل کړي."

دا په داسې حال کې ده چې د درې اوونیو له تیرېدو سره بیا هم ټول هېواد کې خصوصي بانکونه په نورمال ډول فعالیت نه دی پیل کړی، یوازې د ATM دستګاوې په کابل او ولایتونو کې د دې بانکونو په مرکزي دفترونو کې فعال دي.

د افغانستان مرکزي بانک ویلي چې سوداګریز بانکونه دې خپل فعالیتونه د مرکزي بانک له خوا د چمتو شوي طرزالعمل سره سم پرمخ وړي
د افغانستان مرکزي بانک ویلي چې سوداګریز بانکونه دې خپل فعالیتونه د مرکزي بانک له خوا د چمتو شوي طرزالعمل سره سم پرمخ وړي

په هرات ولایت کې د عزیزي بانک مدیر احمد شاه سروري ازادي راډیو ته وویل چې دوی به ډېر ژر زر د بانک فعالیتونو عادي حالت ته را وګرځوي: "اوس مهال د مرکزي بانک د لارښوونو سره سم موږ خپلو مشتریانو ته د ATM له لارې په اوونۍ کې شل زره افغانۍ یا ۲۰۰ ډالر ورکوو، مګر موږ خپل رسميات لا تر اوسه سل په سلو کې نه دي پیل کړي."

د افغانستان مرکزي بانک پرون په یوه بیانیه کې ویلي چې سوداګریز بانکونه دې خپل فعالیتونه د مرکزي بانک له خوا د چمتو شوي طرزالعمل سره سم پرمخ وړي او ژر ده چې بانکونه به د خدماتو وړاندې کولو عادي حالت ته راوګرځي.

د زمري په ۲۴ مه طالبانو ته د کابل تر سقوط وروسته، په ټول هېواد کې د بانکونو او صرافۍ دفترونو فعالیت بند شو چې د هېواد اتباعو ته یې لوی مالي زیان اړولی.

د هېواد ډېری اتباع چې پیسې یې په بانکونو کې بند دي وايي چې دوی ان د خپل ژوند د اولیه توکي پیرلو لپاره پیسې نه لري او د بانکونو او صرافۍ دفترونو فعالیت د بېرته عادي کولو غوښتنه یې کړې.

له بلې خوا ویسټرن یونین په نړۍ کې د پیسو لېږدولو تر ټولو لوی شرکت په یوه اعلامیه کې اعلان کړی چې په افغانستان کې یې خپل فعالیتونه له سره پیل کړي دي.

XS
SM
MD
LG