د افغانستان د ځوانانو د فوټبال ملي لوبډلې یو لوبغاړی ذکي انوري په هغې امریکايي پوځي الوتکه کې د پټېدو د هڅې پرمهال مړ شوی چې له کابله یې خلک بهر لېږدول.
۱۹ کلن انوري د اګست پر ۱۶مه تر هغې وروسته ومړ چې هغه د امریکا د هوايي ځواک په سي-۱۷ جېټ الوتکه پورې د ځان نښلولو هڅه وکړه.
د افغانستان د بدني روزنې ریاست د نوموړي مړینه تایید کړې، خو د انوري د مړینې څرنګوالي په اړه ضد و نقیص رپورټونه دي.
ځینې رپورټونه وايي چې هغه له الوتکې تر پرېوتو وروسته ومړ ځینې نور بیا وايي چې د هغه د وجود برخې د الوتکې د ټایر په برخه کې موندل شوې دي.
د انوري په مړینې باندې ګڼو خلکو په خواله رسنیو خواشیني ښودلې.
د امریکا هوايي ځواک د هغه پرواز په اړه پلټنې کوي چې په کې افغان ملکي وګړو د طالبانو له لوري د افغانستان تر نیولو وروسته له هېواده د تېښتې په موخه په سي-۱۷ الوتکې پورې د نښلېدو هڅه وکړه.
په هغه الوتکه کې شااوخوا ۶۴۰ افغان او امریکايي ملکي وګړي سپاره ول او په هېواد کې د امنیتي وضعیت د خرابېدو په حال کې یې پرواز وکړ.
هغه مهال د حامد کرزي نړیوال هوايي ډګر ته ننوتي افغانان د الوتکې شااوخوا ورغونډ شوي ول.
سي-۱۷ الوتکه چې په قطر کې ښکته شوه نو د پېښې په ځای کې یې د انساني وجود برخې وموندل شوې.