د لاسرسۍ وړ لېنکونه

تازه خبر
جمعه ۲ تله ۱۴۰۰ کابل ۰۱:۴۴

ملګري ملتونه: هغه کسان خطر کې دي چې اردو، پولیسو او استخباراتي قطعو کې وو


د افغانستان امنیتي سرتیري

د ملګرو ملتونو په یوه پټ سند کې راغلي چې طالبانو له دې سره-سره چې ویلي یې دي له خپلو مخالفانو غچ نه اخلي، د هغو کسانو لټون زیات کړی چې له امریکايي او ناټو ځواکونو سره یې کار کړی دی.

دا راپور- چې د ملګرو ملتونو د ګواښ د ارزونې سلاکارانو چمتو کړی او فرانس پرېس خبري اژانس لیدلی وايي، طالبان یو لېست لري چې د هغه پر اساس هغه کسان په کې په نښه شوي چې باید لومړی ونیول شي.

د ملګرو ملتونو د سند له مخې، تر ټولو ډېر هغه کسان په خطر کې دي چې د افغانستان په اردو، پولیسو او استخباراتي قطعو کې یې رول درلود.

په راپور کې دغه راز ویل شوي، طالبان د مطلوبو کسانو او د هغو د کورنۍ د غړیو د نیولو لپاره کور په کور تلاشي اخلي.

راپور زیاتوي، طالبانو د کابل هوايي ډګر ته په لاره او همدا راز د جلال اباد په شمول په نورو لویو ښارونو کې د تلاشۍ پوستې جوړې کړي او هغه کسان لټوي چې د دوی له لېست سره سم باید ونیول شي.

د ملګروملتونو دا سند چې د چهارشنبې په ورځ چمتو شوی، د ناروې د نړیوال مرکز له لوري لیکل شوی دی. دا مرکز د ملګرو ملتونو ادارو ته استخباراتي معلومات ورکوي.

طالبانو د کابل هوايي ډګر ته په لاره د تلاشۍ پوستې جوړې کړي
طالبانو د کابل هوايي ډګر ته په لاره د تلاشۍ پوستې جوړې کړي

د دې مرکز اجراییه ريیسې کرستیان نیلیمان فرانس پرېس خبري اژانس ته ویلي: "طالبان هغه کورنۍ په نښه کوي چې ځانونه نه تسلیموي، هغوی تعقیبوي او سزا ورکوي."

دې دغه راز وویل، اټکل کوي هغه کسان به چې له ناټو او امریکايي پوځیانو سره یې کار کړی دی د کورنیو له غړیو سره شکنجه او ووژني.

د ملګرو ملتونو په سند کې دا هم ویل شوي چې طالبان نوي جاسوسان ګوماري او له دې سره به د دوی د مطلوبو کسانو لېست نور هم لوی شي.

طالبانو د یکشنبې له ورځې چې کابل یې نیولی، خلکو ته ډاډ ورکوي چې له چا به انتقام نه اخیستل کېږي او ټولو ته عمومي عفوه ده.

دې ډلې تر اوسه پورې د ملګرو ملتونو د وروستي راپور په اړه څه نه دي ویلي.

XS
SM
MD
LG