د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۱۰:۱۲

د طالبانو واکمني؛ ځینې کابل ښاریان: د روانو حالاتو دوام به ناورین وزیږوي


یو تن وسله وال طالب
یو تن وسله وال طالب

نن د طالبانو د واکمنۍ څلورمه ورځ ده. په کابل کې لا هم ژوند عادي حالت ته نه دی راګرځېدلی. بانکونه، هټۍ، سوداګریز مرکزونه او صرافیانو خپل فعالیتونه بند کړي.

د دغه ښار ځینې اوسیدونکي وايي، د روانو حالاتو دوام ناورین زیږونکی دی.

کریم، کتاب پلورنځي لري، هغه له ازادي راډیو سره په خبرو کې روان حالت خواشینونکی ښيي: "له هغه وخت چې مجاهدین راغلي دي په کابل ښار کې ژوند سخت شوی او هېڅ څوک نه شي کولی په ارامه ژوند وکړي، ټول مارکیټونه تړل شوي او حالت غیر نورمال دی."

د دې ښار بل اوسیدونکی فخرالدین بیا د امنیت له اړخ خوښي ښيي، خو د هېواد نامعلوم برخلیک اندېښمن کړی: "په کابل ښار کې امنیت شته خو یوه اندېښنه چې موجوده ده هغه د حکومت د یو مشر نشتوالی دی، که هرکله هم د دې ملک لپاره یو زعیم وټاکل شو، بیا مشکلات تر یو حده حلېږي."

د کابل ښار بل اوسیدونکی فخرالدین د امنیت له اړخه خوښي ښيي
د کابل ښار بل اوسیدونکی فخرالدین د امنیت له اړخه خوښي ښيي

د روانې اوونۍ د یکشنبې په ورځ طالبانو د کابل په ګډون د افغانستان د ډېرو ولایتونو واک په لاس کې واخېست. دوی کابل پرته له جګړې ونیوه او خپل جنګیالي یې د دې ښار په ګوټ ګوت کې ځای پرځای کړل.

په ورته وخت کې د طالبانو ویاند ذبیح الله مجاهد په یوې تازه اعلامیه کې ویلي چې طالبان له ټولو خواوو سره د ښو سوداګریزو اړیکو لپاره ژمن دی.

دغې ډلې له دې وړاندې هم په خپلو اعلامیو کې ویلي و چې د خلکو خوندي ساتل یې له هر اړخه لومړیتوب دی.

دا په داسې حال کې ده چې د ځینو خپاره شوېو راپورونو پر بنسټ طالبانو د کابل ښار په ځینو سیمو کې له خلکو شخصي موټر اخیستي او ان تر دې چې د ځینو کورونه یې هم تلاشي کړي دي چې دغه څه بیا طالبان ردوي.

XS
SM
MD
LG