د لاسرسۍ وړ لېنکونه

تازه خبر
دوشنبه ۵ تله ۱۴۰۰ کابل ۰۲:۴۹

بهر ته د ځینو افغانانو تګ؛ طالبانو کابل کې هوايي ډګر ته تللې لارې تړلي


ځینې افغانان د کابل هوايي ډګر د دروازې د پرانیستو په انتظار دي.

بهرني حکومتونه له افغانستانه د زرګونو هغو افغانانو د ایستلو هڅې کوي چې په دې هېواد کې یې له دوی سره کار کړی دی، خو په ورته وخت کې طالبانو د کابل د هوایي ډګر په لور لارې بندې کړي دي.

نن دا اندېښنه هم شته چې ښایي د خپلواکۍ د ورځې په خاطر شخړې رامنځته شي.

د اګست له پنځلسمې چې طالبانو کابل نیولی دی په زرګونو افغانان هڅې کوي چې له افغانستانه ووځي.

د طالبانو مشرانو ویلي دي چې دوی سوله غواړي او د اسلامي ارزښتونو په رڼا کې پراخ بنسټه حکومت غواړي. طالبانو دا هم ویلي دي چې دوی له خپلو دښمنانو غچ نه اخلي.

خو راپورونه وایي چې طالبانو د کابل د هوایي ډګر شااوخوا پاټکونه جوړ کړي دي او ان هغو کسانو ته اجازه نه ورکوي چې اسناد لري.

د طالبانو مشرانو ویلي دي چې دوی سوله غواړي او د اسلامي ارزښتونو په رڼا کې پراخ بنسټه حکومت غواړي
د طالبانو مشرانو ویلي دي چې دوی سوله غواړي او د اسلامي ارزښتونو په رڼا کې پراخ بنسټه حکومت غواړي

طالبانو او د ناټو چارواکو ویلي دي چې تراوسه په کابل کې د حامد کرزي د هوایي ډګر شااوخوا ۱۲ تنه وژل شوي دي.

دا راپورونه په داسې وخت کې خپاره شوې دي چې نن په افغانستان کې د خپلواکۍ د بېرته اخیستلو د نمانځنې ورځ ده او وضعیت کړکېچن ښکاري، پرون هم په جلال اباد کې د طالبانو پر ضد مظاهره وشوه.

وروسته تردې چې طالبانو کابل نیولی دی دا د دې ډلې پر ضد لومړی ډله ییز غبرګون یاد شوی دی.

د طالبانو له لوري د کابل تر نیولو وروسته د امریکا ولسمشر جو بایډن په خپله لومړۍ مرکه کې پرون وویل چې طالبان مرسته کوي څو امریکایان او د امریکا د متحدانو اتباع له افغانستانه ووځي، خو د ښاغلي بایډن په وینا د هغو افغانانو د ایستلو په برخه کې ستونزې شته چې په افغانستان کې یې له نړیوالو سره کار کړی دی او د دوی ژوند د طالبانو تر واک لاندې له خطره خالي نه دی.

ولسمشربایډن "اې بي سي" ټلوېزیون ته وویل چې امریکایي ځواکونه به ښایي د اګسټ تر یودیرشمې نیټې وروسته هم که د امریکایي اتباعو د ایستلو لپاره اړتیا وه، په کابل کې پاتې شي.

ولسمشر جو بایډن په خپله لومړۍ مرکه کې پرون وویل چې طالبان مرسته کوي
ولسمشر جو بایډن په خپله لومړۍ مرکه کې پرون وویل چې طالبان مرسته کوي

پخوا ښاغلي بایډن ویلي و چې امریکا به خپل ټول پوځیان د اګسټ تر اخره له افغانستانه وباسي.

د امریکا د دفاع وزارت په وینا نژدې څلور نیم زره امریکایي سرتیري په کابل هوایي ډګر کې دي او تراوسه له طالبانو سره د دوی کومه ستونزه نه ده رامنځته شوې.

خو د امریکا دفاع وزارت ویلي دي چې دا امریکایي ځواکونه دا توان نه لري چې د هغو خلکو غم وخوري چې د هوایي ډګر لور ته راځي، ځکه چې دا پوځیان د هوایي ډګر امنیت ساتي.

بل لورته د امریکا د بهرنیو چارو د وزارت مرستیالې وینډي شیرمن په واشنګټن کې وویل چې تمه یې دا ده چې طالبان ټولو امریکایي اتباعو، د نورو هېوادونو خلکو او هغو افغانانو ته چې غواړي خپل هېواد پریږدي له خنډ پرته اجازه ورکړي.

اغلې شیرمن بیا وویل چې داسې راپورونه یې ترلاسه کړې دي چې طالبان د هغو افغانانو مخه نیسي چې له خپل هیواده د وتلو نیت لري.

XS
SM
MD
LG