د لاسرسۍ وړ لېنکونه

تازه خبر
جمعه ۱۵ تله ۱۴۰۱ کابل ۰۵:۰۶

جو بایډن: افغانستان کې د امریکا پوځي ماموریت به د اګسټ په ۳۱مه پای ومومي


په افغانستان کې یو شمېر امریکايي سرتیري

د امریکا ولسمشر جو بایډن اعلان وکړ چې د اګسټ میاشتې تر۳۱مې به په افغانستان کې د امریکا پوځي ماموریت پای ته ورسېږي.

نوموړي وویل: "زموږ پوځي ماموریت به په افغانستان کې د اګسټ تر۳۱مې بشپړ شي. د ځواکونو د کمولو بهیر په مصؤن او منظم ډول مخ ته ځي او د وتلو پرمهال د خپلو ځواکونو مصؤنیت ته لومړیتوب ورکول کېږي."

بایډن دغه اعلان تېره شپه په سپینه ماڼې کې وکړ او ویې ویل، هغسې چې د اپریل په میاشت کې یې اعلان کړې وه، په افغانستان کې د امریکا هدف چې عدالت ته د القاعده د مشر اسامه بن لادن راکاږل او پر امریکا د سېپټمبر د ۱۱مې د حملو د نورو ترهګرو ځپل او د القاعده کمزوري کول و، ترلاسه شوی دی.

د امریکا ولسمشر جوبایډن وايي، د امریکايي ځواکونو د کمولو بهیر په مصؤن او منظم ډول مخ ته ځي
د امریکا ولسمشر جوبایډن وايي، د امریکايي ځواکونو د کمولو بهیر په مصؤن او منظم ډول مخ ته ځي

بایډن چې له افغانستانه د ټولو امریکایي ځواکونو د ایستلو لپاره د خپلې پرېکړې له امله د انتقاد کوونکو تر فشار لاندې دی وویل، افغانستان ته امریکا د ملت جوړلو لپاره نه وه تللې او په دې هېواد کې د امریکا تر ټولو اوږده جګړه پای ته رسوي.

بایډن وړاندې وویل: "موږ افغانستان ته د ملت جوړونې لپاره نه وو تللي، دا حق او مسولیت یوازې د افغانانو دی چې د خپلې راتلونکې په اړه پرېکړه وکړي چې په څه ډول غواړي د خپل هېواد چارې سمبال کړي."

موږ افغانستان ته د ملت جوړونې لپاره نه وو تللي.

بایډن د افغانستان له حکومت او د دې هېواد له ځواکونو سره د ملاتړ د دوام ژمنه وکړه او د جګړې په ډګر کې د وسله والو طالبانو له لوري وروستیو چټکو پرمختګونو ته په پام یې وویل چې دی ډاډه دی چې د افغانستان امنیتي او دفاعي ځوکونه به وکولای شي چې د طالبانو په وړاندې ودریږي.

بایډن د خپلې وینا په پای کې په سالون کې د حاضرو خبریالانو چې هر یوه هڅه کوله خپله لومړنۍ پوښتنه وکړي، له ډېرو سختو پوښتنو سره مخامخ شو.

له بایډنه لومړنۍ پوښتنه واک ته د وسله والو طالبانو د احتمالي رسېدو په اړه وه چې یوه خبریال په دې بڼه چې ایا دا د نه مخنیوي وړ دی چې طالبان واک ته ورسېږي، مطرحه کړه: "نه دا ممکنه نه ده ځکه چې هلته درې سوه زره افغان ځواکونه شته چې لکه د نورې نړۍ د هر اردو په څېر ښه مجهز شوي او هم هوایي ځواک شته. دا ځواکونه د شااوخوا ۷۵ زره طالبانو پر وړاندې دي. نه دا د مخنیوي وړ ده."

افغانستان یو شمېر افغان امنیتي سرتیري
افغانستان یو شمېر افغان امنیتي سرتیري

ولسمشر بایډن دغه راز وویل چې هغه په زرګونو افغانان به چې له امریکایي ځواکونو سره یې کار کړی او د طالبانو له ګواښ سره مخامخ دي، وکولای شي چې په متحده ایالاتونو کې پناه واخلي.

هغه زیاته کړه، د جنوري له میاشتې راهیسې چې ده د ولسمشر په توګه دنده پیل کړې، تر اوسه د ویزې د ځانګړې پروګرام په ترڅ کې د دوه نیم زره افغانانو غوښتنلیکونه منل شوي دي.

د امریکا ولسمشر جو بایډن تر ټاکلې نېټې مخکې چې د سېپټمبر ۱۱مه وه، له افغانستانه د ټولو امریکایي ځواکونو د ایستلو لپاره د اګسټ ۳۱مه نېټه داسې مهال اعلانوي چې پنټاګون د سې شنبې په ورځ اعلان وکړ چې له افغانستانه د امریکایي ځواکونو د وتلو بهیر نوي په سلو کې بشپړ شوی دی.

XS
SM
MD
LG