د روغتیا نړیوال سازمان وايي، د اسیا پراختیايي بانک په مرسته، د کووېډ-۱۹ ناروغۍ د تشخیص یو بل لابراتوار په بادغیس ولایت کې پرانیستل شو.
په افغانستان کې د روغتیا نړیوال سازمان (WHO) څانګې پرون شنبه (د چنګاښ په ۱۲مه نېټه)ناوخته په یوه ټویټ کې ویلي، له دې سره د دوی په همکارۍ د دغو لابراتوارونو شمېر ۳۱ ته ورسېد.
بل خوا د افغانستان د عامې روغتیا وزارت سرپرست، وحید مجروح پرون په کابل کې یوه کنفرانس ته وویل، د کرونا ویروس درېیمه څپه لا هم د خپرېدو په حال کې ده.
ښاغلي مجروح وویل، د ویروس دا نوې بڼه د هېواد په مرکزي او لوېدیځو ولایتونو کې ډېره په خپرېدو ده.
په ټوله کې په افغانستان کې په کرونا ویروس د مړو شمېر ۵۲۰۰ ته رسېدلی دی.
په کرونا ویروس د اخته کسانو رسمي شمېر یو لک او څلورویشت زره اووه سوه اووه پنځوس ښوول کېږي. خو اټکل دا دی چې واقعي شمېر به خورا زیات وي.