د امریکا دفاع وزارت وايي چې د طالبانو وروستیو بریدونو او پرمختګونو ته په پام سره ښايي له افغانستانه د امریکايي ځواکونو د وتلو په سرعت کې کموالی راشي.
د پنټاګون ویاند جان کربي پرون دوشنبه (د غبرګولي ۳۱مه) ماښام یوې خبري غونډې ته د وینا پر مهال ټینګار وکړ چې د سېپټمبر تر ۱۱مې پورې له افغانستانه د امریکايي ځواکونو د اېستلو برخه کې د ولسمشر جو بایډن ټاکلی مهلت پرځای دی، خو هغه زیاته یې کړه چې د پوځي ځواکونو د وتلو سرعت، وضعیت ته په پام سره د انعطاف وړ دی.
ښاغلي کربي زیاته کړه: "که د سرتېرو د وتلو د سرعت، څرنګوالي یا کچې په ټاکلې ورځ یا اوونۍ کې بدلون ته اړتیا ولیدل شي، نو موږ غواړو چې په دې برخه کې انعطاف ته ځای پرېږدو."
د پنټاګون ویاند دا څرګندونې پرون وروسته له هغه وکړې چې د افغانستان په شمال کې نژدې لس ولسوالۍ په دوو ورځو کې د افغان ځواکونو او طالبانو ترمنځ لاس په لاس شوې.
ښاغلي کربي زیاته کړه چې د افغانستان وضعیت د بدلون په حال کې دی او دا په داسې حال کې ده چې طالبانو خپلو حملو ته زور ورکړی، د ولسوالیو پر مرکزونو حملې کوي او تاوتریخوالی اوج ته رسېدلی.
د پنټاګون ویاند زیاته کړه چې پوځي چارواکي روان وضعیت په منظم ډول څاري او له افغانستانه د وتلو په برخه کې پرېکړې به روانو جریاناتو ته په پام سره کېږي.
د پنټاګون چارواکو تېره اوونۍ ویلي و چې شااوخوا دوه نیم زره امریکايي سرتېري او شپاړلس زره قراردادیان چې ډېری امریکايي وګړي دي اوس مهال په افغانستان کې دېره دي. د امریکا پوځ په تېره یوه میاشت کې څو مهمې اډې هم افغان ځواکونو ته وسپارلې.
د پنتاګون ویاند زیاته کړه چې امریکايي ځواکونه به له طالبانو سره په جګړه کې د افغان پوځ ملاتړ ته تر هغه وخته دوام ورکړي چې په افغانستان کې امکانات لري.
